Ýurdumyzyň sebitlerinde täze gaz ýataklaryny gözlemegiň we özleşdirmegiň hasabyna «mawy ýangyjyň» çykarylýan möçberlerini artdyrmak möhüm wezipeleriň biridir. Döwlet Baştutanymyzyň tabşyryklaryny, görkezmelerini bada-bat ýerine ýetirmek boýunça «Türkmengaz» döwlet konserniniň gazçylary Mary welaýatynyň çäginde ýerleşýän «Kelleli», «Garabil» gaz ýataklarynda guýulary burawlamak işlerini ýokary depginde alyp barýarlar. Burawlaýjylar «Kelleli» gaz ýatagynyň 01 belgili ulanyş-baha beriş guýusyndan senagat taýdan ähmiýetli gaz akymyny aldylar.
Konserniň “Türkmengazburawlaýyş” müdirliginiň burawlaýjylary “Kelleli” gaz ýatagynyň 01 belgili ulanyş-baha beriş guýusynda tutanýerli zähmet çekip, guýynyň burawlaýyş işini 2525 metr çuňluga ýetirdiler. Olar özlerine berilýän bimöçber kömek-goldawlar esasynda senagat taýdan ähmiýetli tebigy gaz akymyny aldylar.
Hünärmenleriň hasaplamalaryna görä, gaz guýusy her gije-gündizde 571 müň kub metr tebigy gaz berýär. Guýudan alnan tebigy gazyň düzüminiň kükürt-wodorodsyz bolmagy bu ýatagyň önüminiň esasy aýratynlygydyr. Şu günler gazçylar Mary welaýatynyň çäginde ýerleşýän beýleki gaz känlerinde-de guýulary burawlamak işlerine giň gerim berýärler.