Halkara futbol federasiýasynyň (FIFA) ýolbaşçysy Janni Infantino guramanyň öňde boljak ýolbaşçy wezipesi üçin saýlawlara gatnaşmagy maksat edinýär. Bu barada ol FIFA-nyň Wankuwerde geçirilen kongresinde mälim etdi.
Mundan ozal “RMC Sport” telekanaly FIFA-nyň prezidentiniň saýlawlarynyň 2027-nji ýylda Marokkoda geçiriljekdigini habar beripdi.
“FIFA-nyň prezidentligi üçin saýlaw döwri başlaýar. Bu men üçin uly mertebe. Men geljek ýyl geçiriljek FIFA-nyň prezidentiniň saýlawlarynda dalaşgärleriň biri boljakdygymy hemmäňize aýtmak isleýärin” – diýip, Infantino aýtdy.
Infantino 56 ýaşynda, ol 2016-njy ýylyň fewralynda geçirilen nobatdan daşary kongresde FIFA-nyň ýolbaşçysy wezipesine saýlandy. Ol bu wezipede şweýsariýaly Ýozef Blatteriň ýerine geçdi. 2019-njy we 2023-nji ýyllarda Infantino bäsdeşsiz esasda guramanyň prezidentligine gaýtadan saýlandy.
Halkara futbol federasiýasynyň (FIFA) guramanyň ýolbaşçysynyň saýlawlary geçiriljek indiki 77-nji kongresi Marokkonyň paýtagty Rabatda bolar.
“FIFA geňeşiniň tassyklamagyna görä, nobatdan daşary kongres 2026-njy ýylyň 23-nji noýabrynda wirtual görnüşde geçiriler. Onda 2031-nji we 2035-nji ýyllaryň zenanlar arasyndaky dünýä çempionatlaryny haýsy ýurtda geçiriljekdigi barada karar kabul ediler. Geljek ýyl boljak 77-nji kongrese gelsek, ol 2027-nji ýylyň 18-nji martynda Rabatda geçiriler” diýip, Infantino belledi.