2022-nji ýylyň 19-njy fewralynda Türkmenistanda Saýlawlary we sala salşyklary geçirmek boýunça merkezi toparyň mejlisi geçirildi.
“Watan” habarlar gepleşiginde bellenilip geçilişi ýaly, mejlisiň gün tertibine laýyklykda, 2022-nji ýylyň 12-nji martynda geçiriljek Türkmenistanyň Prezidentiniň saýlawlary boýunça raýatlaryň teklipçi toparlary tarapyndan dalaşgärlige hödürlenilen Türkmenistanyň Saglygy goraýyş we derman senagaty ministrliginiň «Awaza» şypahanasynyň baş lukmany, Türkmenistanyň Milli Geňeşiniň Mejlisiniň deputaty Gurbanow Berdimämmet Hanmämmedowiç we Lebap welaýatynyň maliýe-ykdysady orta hünär okuw mekdebiniň direktory Begenjow Perhat Guwançgulyýewiç Türkmenistanyň Prezidenti wezipesine dalaşgärlige bellige alyndy. Mejlisiň dowamynda dalaşgärlere Merkezi saýlaw toparynyň ýolbaşçysy degişli şahsyýetnamany gowşurdy.
Mejlise Merkezi saýlaw toparynyň ýolbaşçysy, agzalary, köpçülikleýin habar beriş serişdeleriniň wekilleri gatnaşdylar.
Dalaşgärleri bellige almak dowam edýär.
Mundan ozal, Türkmenistanyň Demokratik partiýasy tarapyndan hödürlenen Türkmenistanyň Ministrler Kabinetiniň Başlygynyň orunbasary Serdar Berdimuhamedow hem-de Türkmenistanyň Agrar partiýasy tarapyndan hödürlenen Mary welaýatynyň häkiminiň orunbasary Agajan Bekmyradow bellige alyndy.
Şeýlelikde, häzirki wagtda 4 dalaşgär bellige alyndy.
Saýlaw-2022: Ahal we Mary welaýatynyň teklipçi toparlary dalaşgärleri hödürledi