Türkiýe Respublikasynyň Prezidenti Rejep Taýyp Ärdogan hormatly Prezidentimize Halkara Bitaraplyk güni mynasybetli gutlag hatyny iberdi. Bu gutlag haty “Watan” habarlar gepleşiginde okaldy.
Türkiýe Respublikasynyň Prezidentiniň gutlag hatynda şeýle diýilýär:
– Siziň Alyhezretiňizi we doganlyk türkmen halkyny Türkiýe Respublikasynyň halkynyň hem-de hut öz adymdan Türkmenistanyň Bitaraplyk güni mynasybetli tüýs ýürekden gutlaýaryn.
2021-nji ýylyň 27-28-nji noýabrynda Türkmenistana bolan döwlet saparymyň dowamynda hem-de Ykdysady Hyzmatdaşlyk Guramasynyň sammitinde maňa hem-de Türkiýäniň wekiliýetine görkezilen myhmansöýerlik üçin ýene-de bir gezek hoşallyk bildirýärin.
Birleşen Milletler Guramasynyň Baş Assambleýasynda 1995-nji ýylyň 12-nji dekabrynda Türkiýe tarapyndan hem goldanylan hemişelik Bitaraplyk hukuk derejesine eýe bolandan soňra Türkmenistan beýleki döwletler bilen gatnaşyklary has-da pugtalandyrdy we sebitde durnuklylygyň hem-de abadançylygyň üpjün edilmegine uly goşant goşdy.
Türkiýe geljekde-de umumy taryhy, medeni gymmatlyklary bolan Türkmenistany hem-de onuň 26 ýylyň dowamynda üstünlikli amala aşyrýan Bitaraplyk derejesini goldar.
Gadyrly doganym, pursatdan peýdalanyp, Siziň Alyhezretiňize berk jan saglyk hem-de bagt, Türkmenistanyň doganlyk halkyna bolsa, rowaçlyk we ösüş arzuw edýarin.