Portugaliýaly tälimçi Žoze Mourinýonyň ýolbaşçlygyndaky Angliýanyň “Tottenhem” topary garaşylmadyk ýagdaýda UEFA-nyň Ýewropa Ligasynda Horwatiýanyň “Dinamo Zagreb” toparyndan 3:0 hasabynda utulyp, bu abraýly ýaryşdan çykdy.
Şondan soňra metbugatda toparyň tälimçisiniň ýagdaýy täzeden gürrüň edilip başlandy. Onuň işiniň bes edilip edilmejekdigi barada dürli habarlar ýaýrady. Ýöne “Tottenhem” topary üçin Mourinýony kowmak ýeňil düşmeýär. Bu ykdysady babatda şeýle. toparyň tälimçisiniň işini bes eden halatynda oňa 40 million ýewro öwez tölegi tölemeli bolýar.
Portugaliýaly tälimçiniň şertnamasynyň şertlerine laýyklykda, onuň işiniň wagtyndna öň bes edilmegi topara ykdysady kynçylyklar döredýär. Mourinýo 2023-nji ýylyň iýun aýyna çenli bu topar bilen şertnama baglaşdy. Onuň ýyllyk aýlygy 17,5 million ýewro deňdir.
“Tottenhem” topary Angliýanyň milli çempionatyna gowy başlasa-da, soňky döwürde yzly-yzyna şowsuz oýunlary bilen çempionlykdan daşlaşdy. Häzirki wagtda topar 28 duşuşykda 45 utuk toplap, 8-nji orunda barýar.