Bütindünýä Saglygy Goraýyş Guramasy (BSGG) orta we pes girdejili 92 ýurtda fewral aýynda sanjym edilip başlanmagynyň mümkindigini belledi. Bu barada metbugat gulluklary habar berýär.
BSGG-niň baş geňeşçisi Brýus Aýlward pes we orta girdejili 92 ýurtda täze koronawirus (Covid-19) ýokanjyna garşy sanjymyň fewral aýynda başlajakdygyna ynanýandyklaryny aýtdy. Bu barada metbugat ýygnagyny geçiren ygtyýarly wekil häzirki wagtda 40-dan gowrak ýurtda koronawirus ýokanjyna garşy sanjym edilýändigini mälim etdi. Häzirki wagtda ýokary we orta girdejili ýurtlarda sanjym işiniň ýola goýlandygyny belledi.
BSGG-niň ygtyýarly wekili fewral aýynda ýene-de 92 ýurtda sanjym işine girişiljekdigine ynanýandyklaryny belledi. Bu babatda sanjym öndürýän kompaniýalarynyň hyzmatdaşlygyna bil baglaýandyklayrny aýtdy.
ABŞ-DA SANJYMYŇ ALNYP BARLYŞY
Amerikanyň Birleşen Ştatlarynyň Kesellere gözegçilik we öňüni alyş merkezi (CDC) şu wagta çenli koronawirus epidemiýasyna garşy 9 milliona golaý amerikalynyň sanjym edilendigini habar berdi.
TÜRKIÝEDE SANJYMA GIRIŞILER
Türkiýede hem sanjym işine şu hepde başlamakçy bolýar. Hytaýdan getirilen sanjymlar urlup başlanar. Türkiýäniň Prezidenti Rejep Taýyp Ärdogan bu barada eden metbugat ýygnagynda ilkinji tapgyrda Hytaýdna 3 million doza sanjymyň getirilendigimi, Germaniýada öndürilen sanjym babatda şertnama baglaşylandygyny, gepleşikleriň dowam etdirilýändigini, Russiýada we Beýik Britaniýada öndürilen sanjymlar bilen baglanyşykly ýagdaýlary yzygiderli öwrenýändiklerini belledi. Şeýle hem ol Türkiýäniň öz sanjymyny öndürmegi babatda hem degişli işleriň alnyp barylýandygyny mälim etdi.
Şeýle hem “BioNTech/Pfizer” sanjymynyň önümçilik möçberiniň 2021-nji ýylda 1,3 milliard dozadan 2 milliard doza çenli ýokarlandyrmagyň maksat edinilýändigi mälim edildi. Bu sanjymlaryň kompaniýalarynyň 6 önümçilik desgasynda öndüriljekdigi belli boldy.
UKRAINA HYTAÝDAN SANJYM ALAR
Ukrainanyň “Lekhim” kompaniýasy 2021-nji ýylyň birinji ýarymynda Hytaýyň “Sinowac” kompaniýasy bilen täze koronawirusa garşy 5 million dozada sanjym bermek barada şertnama baglaşdy. Bu barada kompaniýanyň metbugat gullugy habar berdi.
RUSSIÝANYŇ SANJYMYNY TASSYKLARLAR
Dünýäniň 10-a golaý ýurdunyň Russiýanyň “Sputnik V” koronawirus sanjymyny şu aýyň ahyryna çenli hasaba aljakdygy mälim edildi. Bu barada Russiýanyň göni maýa goýum gaznasynyň (RDIF) başlygy Kirill Dmitriýew rus teleýaýlymyndaky “Agşam habarlary” gepleşiginde habar berdi.
Hünärmenleriň teswirlerini okamak üçin bu sahypamyza yzygiderli gelip duruň!
