Şu ýylyň awgust aýynyň 24-27-si aralygynda Eýran Yslam Respublikasynyň Kärdeşler arkalaşyklary Konfederasiýasynyň Prezidenti Ali Reza Mahjoubynyň ýolbaşçylygyndaky wekiliýet Türkmenistan döwletimize iş saparyny amala aşyrdy. 2023-nji ýylyň awgust aýynyň 24-den sentýabr aýynyň 14-ne çenli dowam etjek syýahat görnüşli bu saparyň esasy maksady Merkezi Aziýa ýurtlarynyň Kärdeşler arkalaşyklarynyň işleri bilen giňden tanyşmakdan, halkara tejribesini öwrenmekden ybarat. Bu barada Türkmenistanyň Kärdeşler arkalaşyklarynyň Milli merkeziniň resmi saýtynda bellenilip geçilýär.
Wekiller Türkmenistan döwletimize amala aşyran iş saparynyň dowamynda Türkmenistanyň Kärdeşler arkalaşyklarynyň Milli merkeziniň başlygy şeýle-de wekilleri bilen duşuşyk geçirip, KA-nyň alyp barýan işleri bilen giňden tanyşdylar we alnyp barylýan hyzmatdaşlygyň beýleki ugurlaryny ara alyp maslahatlaşyp mundan beýläk hem iki guramanyň arasyndaky gatnaşyklary has-da çuňlaşdyrmalydyrys diýip bellediler.
Iki döwletiň KA-nyň bähbitlerini nazarlaýan duşuşygyň dowamynda wekilleriň hyzmatdaşlygyň geljekki mümkinçilikleri baradaky pikir-garaýyşlaryny paýlaşmaklary dostlukly iki ýurduň arasyndaky alnyp barylýan gatnaşyklaryň ilerledilmegine goşant goşar.
Wekiliýetiň düzümi Ahmad Eýran Yslam Respublikasynyň Kärdeşler arkalaşyklary Konfederasiýasynyň Bilim departamentiniň maslahatçysy – YarMohammadi, Eýran Yslam Respublikasynyň Kärdeşler arkalaşyklary Konfederasiýasynyň Ýaşlar departamentiniň direktory, halkara departamentiniň maslahatçysy – MohammadSadegh MohseniKabir, Eýran Yslam Respublikasynyň Kärdeşler arkalaşyklary Konfederasiýasynyň Zenanlar departamentiniň direktory – Marýam Gilan pour, Saglyk ulgamynyň ylmy barlagçysy, psiholog – Azadeh Taghavi, Fatemeh Mahjoob – wekiliýet agzalaryndan ybarat bolup, saparyň dowamynda ýurdumyzyň taryhy bilen giňden tanyşmak maksady bilen Türkmenistanyň Döwlet Medeniýet merkeziniň Döwlet muzeýine, Türkmen halysynyň Milli muzeýine, ýurdumyzyň gözel taryhy künjeginde Köpetdagyň eteginde ýerleşýän «Nusaý» döwlet taryhy-medeni goraghanasyna aýlanyp, medeniýetimiz däp-dessurlarymyz bilen giňden tanyş boldular.