ABŞ-nyň Prezidenti Donald Tramp 2026-njy ýylda ABŞ-da geçiriljek FIFA Dünýä Çempionaty üçin syýahat etjek daşary ýurtly tomaşaçylara niýetlenen täze mümkinçilik — “FIFA Pass” ulgamyny resmi taýdan hödürledi.
Bu täze başlangyç FIFA arkaly resmi bilet alan syýahatçylaryň wiza ýüz tutmalarynyň hem-de ýüzbe-ýüz söhbetdeşlikleriň has öňe geçirilen tertipde amala aşyrylmagyny üpjün eder.
Owal ofisinde duşuşyk
FIFA-nyň prezidenti Gianni Infantino bilen Prezident Trampyň Ak Tamyň Owal ofisindäki duşuşygynda ilkinji gezek resmi taýdan mälim edilen bu ulgamyň doly ady “prioritized appointments scheduling system” diýip atlandyrylýar — ýagny öňe tutulýan kabul edilme tertibi.
Infantino çykyşynda şeýle diýdi:
“Eger siz Dünýä Çempionaty üçin resmi FIFA biletini satyn alan bolsaňyz, onda ABŞ wizasy üçin öňe geçirilýän kabul ediş wagtyny alyp bilersiňiz.”
“Siz ilkinji duşuşanymyzdan bäri şuny aýdýardyňyz, jenap Prezident — Amerika dünýäni garşy alýar.”
Prezident Tramp hem futbol janköýerlerine ýüzlenip:
“Wizalar üçin mümkin boldugyndan çalt ýüz tutmagyňyzy berk maslahat berýärin” — diýdi.
400-den gowrak täze konsul işgärleri
ABŞ-nyň Döwlet sekretary Marko Rubio bu maksatnama bilen baglylykda dünýäniň dürli ýurtlarynda 400-den gowrak täze konsul işgäriniň işe bellenendigini aýtdy. Häzirki wagtda dünýäniň takmynan 80% ýurtlarynda ABŞ wiza kabul wagty 60 günüň içinde elýeterli edilýär.
“FIFA portal” arkaly tizleşdirilen hyzmat
Täze ulgam bilen FIFA biletini alan ýolagçylar ýörite “FIFA portal” arkaly wiza ýüz tutmalaryny we söhbetdeşliklerini prioritete goýduryp bilerler. Bu bolsa müňlerçe halkara janköýeriň ýüz tutýan wiza işleriniň wagtyny ep-esli gysgaldar.