Angliýanyň “Mançester Siti” topary argentinaly hüjümçi Serhio Agueronyň möwsümiň ahyrynda topardan gitjekdigini mälim etdi. Topar tarapyndan berlen beýanata görä, 2011-nji ýyldan bäri bu toparyň düzüminde çykyş edip gelýän 32 ýaşly Agueronyň möwsümiň ahyrynda şertnamasynyň möhleti tamamlanýar. Bu futbolçy bilen şertnamanyň uzadylmajakdygy hem-de oňa topara goşan goşandy üçin minnetdarlyk bildirildi.
Toparyň güýçli hem-de esasy futbolçylaryň birine öwrülen Aguero bilen bir hatarda bu toparyň üstünliklerine goşant goşan Winsent Kompaniniň hem-de Dewid Silwanyň heýkelleri toparyň “Etihad” stadionynda goýlar.
Aguero bu toparyň düzüminde çykyş eden döwründe 3 gezek Angliýanyň çempiony, 5 gezek Liganyň kubogyny, bir gezek Federasiýanyň kubogyny gazandy. Ol 384 duşuşykda oýnap, 257 pökgi geçirip, toparyň iň köp gol geçiren futbolçylarynyň biridir.
Ol soňky döwürde ýygy-ýygydan şikes alyp, toparyň düzüminde köp çykyş edip bilmedi. 14 duşuşykda oýnap, 3 gezek tapawutlandy.
Argentinaly futbolçynyň mundan soňky toparynyň Ispaniýanyň “Barselona” topary boljakdygy aýdylýar. Bu toparda onuň dosty hem-de ildeşi Lionel Messi çykyş edýär.