Türkmenistanyň Senagatçylar we telekeçiler birleşmesiniň agzalary ýyladyşhanalary ösdürmäge bagyşlanan onlaýn duşuşyga gatnaşdylar we olar Türkiýedäki kärdeşleri bilen tejribe alyşdylar. Bu barada “orient.tm” internet neşirinde habar berilýär.
Antalýanyň Söwda we oba hojalygy edarasynyň, ýyladyşhanalar üçin enjamlary öndürýän we eksport edýän Assosiasiýanyň hem-de iri agrosenagt kompaniýalaryň wekilleri ýyladyşhana şertlerinde gök önümleri we miweleri ýetişdirmegiň usullary we tehnologiýalary barada gürrüň berdiler.
Onlaýn duşuşyga Türkiýäniň Türkmenistandaky ilçihanasynyň wekilleri, Ýewropanyň Täzeleniş we ösüş bankynyň wekilhanasynyň, türkmen-türk paýdarlar täjirçilik bankynyň, Türkiýäniň Senagat we söwda ministrliginiň wekilleri hem gatnaşdy.
Çäräniň dowamynda häzirki döwürde ýyladyşhana üçin önümçilik meýilnamalarynyň üstünlikli durmuşa geçirilmegi koronawirus pandemiýasyndan soň ykdysadyýetiň dikeldilmegini ep-esli çaltlaşdyryp biljekdigi nygtaldy.
Döwlet statistika komitetiniň habaryna görä, şu ýylyň ýanwar-aprel aýlarynda Türkmenistanyň ähli hojalyklarynda gök önüm önümçiligi geçen ýylyň degişli döwri bilen deňeşdirilende 26,7 göterim ýokarlandy. Mundan başga-da, bu hojalyklaryň köpüsi hususy pudaga degişlidir.