Futbol boýunça Ýewropa çempionatynda gyzykly we garaşylmadyk netijeli duşuşyklar geçirildi. Germaniýanyň ýygyndysy hakyky oýnuny görkezdi. Olar üçin garşydaşynyň Kristiano Ronaldo bolsa hem parhy ýok.
“F” TOPARY: GERMANIÝA 4:2 HASABYNDA ÝEŇDI
Ýewropa çempionatynda toparlardaky 2-nji duşuşyklar tamamlandy. “F” toparynda ilki bilen Wengriýa bilen Fransiýanyň milli ýygyndylary duşuşdy. Budapeşt şäherindäki duşuşykda wengerler dünýä çempionyna garşy gaty gowy oýun görkezdi. Çempionatyň garaşylmadyk netijesi hem bolup bilerdi. Wengirýanyň ýygyndysy birinji ýarymyň soňky minutynda Attila Fiola bilen öňe geçdi. Ýöne fransuzlar duşuşygyň ikinji ýarymynda Antuan Grizmannyň 66-njy minutynda geçiren goly bilen hasaby deňledi we duşuşyk şol hasap bilen tamamlandy.
Toparyň beýleki duşuşygynda Germaniýanyň ýygyndysy 4:2 hasabynda ýeňdi. Onda-da Ronaldoly Portugaliýanyň milli ýygydysyny ýeňmegi başardy. Ronaldo 15-nji minutda hasaby açdy we özüniň 107-nji goly geçirdi. Ol rekordyna barha golaýlaýar.
Germanlar bu goldan soň has-da tijendi we 35-nji minutda Ruben Diaş we 39-njy minutda Gerreýru öz derwezesine gol geçirdi. Soňra Hawerts 51-nji we Gozens 60-njy minutlarda tapawutlanyp, Germaniýanyň 4:2 hasabynda ýeňmegine kömek etdi. Portugallaryň ikinji goluny 67-nji minutda Diego Žota öz adyna ýazdyrdy.
Şeýlelikde, bu toparda Fransiýanyň 4 utugy, Germaniýa bilen Portugaliýanyň 3 utugy, Wengriýanyň 1 utugy bar. Indiki tapgyrda Fransiýa bilen Portugaliýa, Germaniýa bilen Wengriýa duşuşar.
ISPANLAR GARAŞYLAN OÝNUNY GÖRKEZIP BILMEÝÄR
“E” toparynda Ispaniýa bilen Polşanyň ýygyndylar duşuşdy. Duşuşyk 1:1 deňme-deň oýnadylar. Ispanlardan 25-nji minutda Morata, polýaklardan bolsa 54-nji minutda Lewandowski tapawutlandy.
Bu toparda Şwesiýanyň 4, Slowakiýanyň 3, Ispaniýanyň 2, Polşanyň 1 utugy bar.
Indiki tapgyrda Polşa Şwesiýa bilen, Ispaniýa bolsa Slowakiýa bilen duşuşar. Her toparyň hem indiki tapgyra çykmaga mümkinçiligi bar.