Ýaponiýa bilen Merkezi Aziýanyň bäş ýurdy arasynda, tebigy baýlyklar we sanly tehnologiýalar ýaly ugurlary öz içine alýan döwlet we hususy pudaklaryň arasynda hyzmatdaşlyk boýunça jemi 158 şertnama gazanyldy diýip, Ýaponiýanyň hökümeti mälim etdi.
Bu barada Tokioda Ýaponiýa bilen Merkezi Aziýa ýurtlarynyň — Gazagystan, Özbegistan, Türkmenistan, Gyrgyzystan we Täjigistan — arasynda geçirilen iki günlük sammitiň çäginde guralan işewürlik maslahatynda habar berildi.
Şeýle hem Ýaponiýanyň Premýer-ministri Sanae Takaiti bu sammitiň netijeleri boýunça geçiren metbugat ýygnagynda şeýle diýdi:
– Merkezi Aziýanyň bäş ýurdunyň prezidentleriniň gatnaşmagynda “Merkezi Aziýa + Ýaponiýa” Dialogynyň ýolbaşçylar derejesindäki ilkinji duşuşygyny geçirdim. Bu Dialog Ýaponiýa tarapyndan beýleki ýurtlardan öň, 2004-nji ýylda döredilen hyzmatdaşlyk çägidir.
Merkezi Aziýa geopolitika, ykdysady howpsuzlyk hem-de özara bähbitli işewürlik mümkinçilikleri nukdaýnazaryndan örän möhüm strategik ähmiýete we uly mümkinçiliklere eýedir. Bu ýolbaşçylar duşuşygynyň çäginde döwlet we hususy pudaklardan 150-den gowrak resminamanyň gol çekilip hödürlenendigine men örän begenýärin. Mundan başga-da, Ýaponiýa bilen bäş ýurduň ýolbaşçylarynyň arasynda bilelikdäki beýanat hökmünde Tokio Deklarasiýasyny kabul etdik.
Geljekde biz, esasan-da, üç esasy ugra — ýaşyl durnuklylyk, baglanyşyk we adam serişdeleriniň ösüşi — ünsi jemläp, özara bähbitli taslamalary öňe ilerlederis.
Mundan başga-da, ykdysady gatnaşyklarymyzyň geljegine uly umyt bildirilýändigini nazara alyp, geljek bäş ýylyň dowamynda hususy pudak tarapyndan jemi takmynan üç trillion ýen (19 milliard dollar) möçberindäki taslamalary amala aşyrmagy maksat edinýäris.
Ozal hem habar berşimiz ýaly, Türkmenistanyň Prezidenti Serdar Berdimuhamedow ilkinji gezek geçirilen “Merkezi Aziýa-Ýaponiýa” sammitine gatnaşdy.
Şeýle hem sammite Ýaponiýanyň Premýer-ministri Sanae Takaiti, Gazagystan Respublikasynyň Prezidenti Kasym-Žomart Tokaýew, Gyrgyz Respublikasynyň Prezidenti Sadyr Žaparow, Täjigistan Respublikasynyň Prezidenti Emomali Rahmon we Özbegistan Respublikasynyň Prezidenti Şawkat Mirziýoýew hem gatnaşandygy bellemek bolar.