Türkmenistanyň Halkara ynsanperwer ylymlary we ösüş uniwersiteti bilen Awstriýanyň Krems praktiki ähmiýetli ylymlar uniwersitetiniň arasynda hyzmatdaşlyk gatnaşyklaryny ýola goýmak maksady bilen degişli özara düşünişmek hakyndaky ähtnama gol çekildi. Bu barada Türkmenistanyň Awstriýa Respublikasyndaky ilçihanasynyň jemgyýetçilik torunda habar berilýär.
Bu resminama Halkara ynsanperwer ylymlary we ösüş uniwersitetiniň rektory Esen Aýdogdyýew bilen Krems praktiki ähmiýetli ylymlar uniwersitetiniň ýerine ýetiriji direktory professor Karl Ennsfellneriň arasynda gol çekildi.
Bu ähtnama laýyklykda, ýokary okuw mekdepleri bilim we ylmy barlaglar taslamalary, alyş-çalyş maksatnamalaryny durmuşa geçirmek, talyplaryň alyş-çalşygy ýaly ugurlarda işjeň hyzmatdaşlyk eder.
Halkara ynsanperwer ylymlary we ösüş uniwersitetiniň öňdebaryjy daşary ýurt uniwersitetleri bilen hyzmatdaşlyk maksatnamalarynyň çäginde alyp barýan halkara işi, uniwersitetiň Türkmenistanyň ýokary bilim ulgamynda ornuny ýokarlandyrmaga we dünýä bilim we ylym jemgyýetine mundan beýläk-de goşulyşmaga gönükdirilendir.