22-nji noýabrda Stambul kongress-merkezinde Türkiýäniň Energetika ministrliginiň hemaýatkärliginde Anadolu agentligi tarapyndan Stambul energetika forumy geçirildi. Oňa Türkmenistanyň wekiliýeti, has dogrusy “Türkmengaz” döwlet konserniniň başlygy Maksat Babaýew gatnaşdy.
Türk metbugatyndaky habara görä, Türkiýäniň energetika ministri Alparslan Baýraktar “Türkmengaz” döwlet konserniniň başlygy Maksat Babaýew bilen duşuşdy. Duşuşykda Türkmenistanyň tebigy gazynyň Ýewropa iberilmegi, şeýle hem nebitgaz pudagyndaky ikitaraplaýyn hyzmatdaşlyk gatnaşyklary ara alnyp maslahatlaşdy.
Türkiýäniň energetika ministri Alparslan Baýraktar “X” jemgyýetçilik torunda Türkiýäniň Energetika ministrliginiň hemaýatkärliginde Anadolu agentligi tarapyndan “Umumy geljek, umumy maksatlar” şygary bilen geçirilen Stambul energetika forumynda “Türkmengaz” döwlet konserniniň başlygy Maksat Babaýew bilen duşuşandygyny habar berdi.
– Türkmenistan gazyny biziň ýurdumyza we ol ýerden Ýewropa iberilmeginiň alternatiw ugurlary boýunça pikir alyşdyk. Şeýle hem, “BOTAŞ” we “TPAO” milli kompaniýalarymyz bilen Türkmenistanyň nebit we tebigy gaz ýataklarynda durmuşa geçirilip bilinjek bilelikdäki taslamalary ara alyp maslahatlaşdyk – diýip, Türkiýäniň ministri Alparslan Baýraktar belläp geçdi.