Hormatly Prezidentimiz Serdar Berdimuhamedow Russiýa Federasiýasynyň Prezidenti Wladimir Putine doglan güni mynasybetli tüýs ýürekden gutlaglaryny we iň gowy arzuwlaryny iberdi.
Döwlet Baştutanymyz Türkmenistan bilen Russiýa Federasiýasynyň arasyndaky gatnaşyklaryň yzygiderli ösdürilýändigini uly kanagatlanma bilen belledi.
“Biz Türkmenistanda ýurtlarymyzyň arasyndaky dostlugy berkitmäge Siziň berýän ünsüňize, şeýle hem strategik hyzmatdaşlygymyzyň yzygiderli giňeldilmegine goşýan şahsy goşandyňyza ýokary baha berýäris” diýip, hormatly Prezidentimiz hatynda nygtady hem-de türkmen-rus döwletara gatnaşyklarynyň bilelikdäki tagallalaryň netijesinde geljekde hem halklarymyzyň bähbidine berkidiljekdigine berk ynam bildirdi.
Döwlet Baştutanymyz Serdar Berdimuhamedow ýakymly mümkinçilikden peýdalanyp, Prezident Wladimir Putine tüýs ýürekden berk jan saglyk, bagtyýarlyk, döwlet işinde üstünlikleri, Russiýa Federasiýasynyň dostlukly halkyna bolsa abadançylyk hem-de gülläp ösüş arzuw etdi.