«Awaza» milli syýahatçylyk zolagyynda Türkmenistanyň Maýa goýum forumy (TIF 2025) başlady. Forum 19-njy sentýabra çenli dowam eder. Bu giň göwrümli çäre daşary ýurt maýa goýumlaryny çekmäge gönükdirilip, 45 ýurtdan 800-den gowrak wekiliýeti birleşdirdi. Gatnaşyjylaryň arasynda ýokary döwlet işgärleri, iri halkara kompaniýalaryň ýolbaşçylary, maýa goýum banklarynyň ýolbaşçylary we öňdebaryjy hünärmenler bar.
Forumyň açylyşynda Türkmenistanyň Prezidenti Serdar Berdimuhamedowyň Gutlag haty okaldy. Ony maliýe we ykdysadyýet ministri Mämmetguly Astanagulyýew okady. Birinji günüň esasy wakasy «Strategiki netijeliligiň faktory hökmünde Türkmenistanyň maýa goýum özüne çekijiligi» atly plenar mejlis boldy.
Onuň moderatorlygyna BMG-niň Türkmenistandaky hemişelik utgaşdyryjysy Dmitriý Şlapatçenko çykyş etdi. Çykyş edenleriň arasynda dünýä derejesindäki abraýly bilermenler bardy. Şolaryň arasynda Bütindünýä bankynyň ýerine ýetiriji direktory Beatris Lus Maser Mallor we BMG-niň Baş sekretarynyň orunbasary Rabab Fatima bar.
Iki günüň dowamynda forumyň gatnaşyjylaryna Türkmenistanyň ykdysadyýetiniň möhüm pudaklarynda — energetika, logistika, gurluşyk, maliýe we innowasiýalar ugrunda durmuşa taýýarlanan taslamalar görkeziler. Şeýle hem döwlet- hususy hyzmatdaşlyk, «ýaşyl» we sanly özgertmeler, oba hojalygy meselelerine aýratyn üns berler.
Forumyň halkara derejesini onuň giň goldawy görkezýär: ony 50-den gowrak resmi hyzmatdaş we gurama goldaýar. Olar arasynda Bütindünýä banky, Aziýa ösüş banky, BMG we Ýewropanyň Täzeleniş we Ösüş banky (ÝTÖB), şeýle hem “Daewoo E&C” we “John Deere” ýaly iri kompaniýalar bar.
TIF 2025 Türkmenistanyň Maliýe we ykdysadyýet ministrligi, Türkmenistanyň Daşary işler ministrligi we «Turkmen Congress» tarapyndan guralýar.