Ýakynda Hytaý Halk Respublikasynyň paýtagty Pekin şäherinde Türkmenistanyň Medeniýet ýyly geçirildi. Bu Medeniýet ýylyna Maýa Kulyýewa adyndaky Türkmen milli konserwatoriýasynyň kamera orkestrinden düzülen topar, şol topara degişli mugallymlardyr talyplar, we sungat ussatlary gatnaşdylar. Medeniýet ýyly hökmünde geçirilen dabaraly çäreler 4 – 7-nji iýun aralygynda bolup, ýylyň ýapylyş dabarasy hökmünde konsert çäresi geçirildi.
Konsertde konserwatoriýanyň «Orkestr saz gurallary» fakultetiniň «Kirişli saz gurallary» kafedrasynyň uly mugallymy Tahyr Ataýewiň kamera orkestrinden düzülen topar, uly mugallymlar Türkmenistanyň Hormatly il ýaşulusy, professor Atageldi Garýagdyýew, Türkmenistanyň halk artistleri ussat aýdymçy Atajan Berdiýew, bagşy Almagül Nazarowa, Türkmenistanyň sungatda at gazanan medeniýet işgärleri Amangeldi Amanow, Gözel Annahanowa, dutarda Aýgül Ýagşyýewa özleriniň ussatlyk başarnyklary bilen çykyş etdiler.
Konsertiň başynda kamera orkestriniň ýerine ýetirmeginde, ilki bilen, ussat kompozitor Aman Agajykowyň döreden «Dabaraly eser»-i ýaňlandy.
Konsertiň dowamynda şol orkestriň sazandarlyk etmeginde dutarçy mugallym Aýgül Ýagşyýewanyň çalmagynda meşhur «Şükür bagşy» filminde ýaňlanýan birnäçe saz parçalary ussatlyk bilen ýerine ýetirildi. Soňra aýdymçy Gözel Annahanowa bilen bilelikde «Mukamyň syry» kinofilminde ýaňlanýan Karkaranyň aýdymy ýaňlandy. Soňra bolsa Aýgül Ýagşyýewa türkmen halk sazy «Durdy bagşy» atly eserini ussatlyk bilen ýerine ýetirdi.
Konsert türkmen we hytaý halk, liriki aýdym-sazlaryndan düzülen dürli çykyşlar bilen dowam etdi.
Konsertiň jemleýji pursatlarynda bolsa birnäçe dabaraly aýdymlar ýaňlandy.
Atajan Berdiýew we Gözel Annahanowa Weli Muhadowyň we Adrian Şapoşnikowyň bilelikde döreden «Kemine we kazy» operasyndan Ogulbeg bilen Daňataryň hem-de Aýlar bilen Çaryýaryň aýdyşygy ussatlyk bilen ýaňlanyp, dabaraly konserte gatnaşanlara uly täsirlenme goýup, olaryň gyzgyn el çarpyşmalaryna mynasyp boldy.
Konsertde Atageldi Garýagdyýew Ž.Rossininiň «Figaronyň ariýasy» jemleme hökmünde ussatlyk bilen ýerine ýetirip, gyzgyn el çarpyşmalara mynasyp boldy. Soňra bolsa konsert Weli Muhadowyň Abaýdy Lokgaýewiň sözlerine döreden «Gel Türkmenistana» atly aýdymy bilen ähli konserte gatnaşyjylaryň ýerine ýetirmeginde dabaraly ýaňlanyp, konserti jemledi.