2026-njy ýylyň 15-19-njy sentýabry aralygynda Gyrgyzystan Respublikasynyň Bişkek şäherinde FIFA-nyň Ýaş zehinleri ösdürmek maksatnamasynyň (FIFA Talent Development Scheme – TDS) çäklerinde halkara okuw-maslahaty hem-de tejribe alyşmak maslahaty geçirildi.
Ýaşlar futboluny ösdürmäge, zehinli oýunçylary ýüze çykarmaga we tälimçilik usulyýetini kämilleşdirmäge gönükdirilen bu uly göwrümli çärede Türkmenistanyň Futbol federasiýasy hem işjeň gatnaşdy.
Halkara maslahatda biziň ýurdumyza Türkmenistanyň Futbol federasiýasynyň Tehniki direktory Röwşen Meredow hem-de TDS taslamasynyň ýolbaşçysy Şöhrat Arjanow wekilçilik etdiler. Bäş günüň dowamynda geçirilen maslahatda FIFA-nyň halkara hünärmenleri we Sebitiň futbol federasiýalarynyň wekilleri ýaşlar futboly boýunça möhüm temalary ara alyp maslahatlaşdylar:
Ýaş zehinleri irki tapgyrda dogry ýüze çykarmak we olaryň fiziki taktik halkara standartlara laýyklykda kämilleşdirmek;
Milli ýygyndylaryň ýaşlar düzümlerini taýýarlamakda täze usulyýetleri we strategiýalary ulanmak;
Milli federasiýalaryň hem-de futbol akademiýalarynyň özara hyzmatdaşlygyny berkitmek;
2025-2026-njy ýyllaryň ýaşlar arasyndaky dünýä çempionatlarynyň derňewleri we futbolyň häzirki zaman ösüş meýilleri;
Hünärmenlerimiz maslahatyň çäginde diňe bir nazaryýet we strategiýa sapaklaryna gatnaşman, eýsem, Bişkek şäherindäki täze gurlan modern “Bishkek Arena” stadionynda we “Muras” türgenleşik merkezinde geçirilen amaly sapaklara hem gatnaşyp, özara tejribe alyşdylar.
Türkmenistanyň Futbol federasiýasynyň wekilleriniň bu halkara okuw-maslahatyna gatnaşmagy ýurdumyzda ýaşlar futboluny halkara talaplaryna we FIFA-nyň öňdebaryjy standartlaryna laýyklykda ösdürmäge, geljegi uly bolan zehinlileri ýüze çykaryp, olary uly futbolyň belent sepgitlerine taýýarlamaga uly itergi berer.