BMG-niň Nýu-Ýorkdaky baş edarasynda Türkmenistanyň Ministrler Kabinetiniň Başlygynyň orunbasary, daşary işler ministri Raşid Meredowyň BMG-niň Baş sekretary Antoniu Guterriş bilen duşuşygy boldy.
Baş sekretar Türkmenistanyň hemişelik bitaraplyk syýasatyna ýokary baha berip, Türkmenistanyň ýolbaşçylygynyň alyp barýan daşary syýasatynyň parahatçylygy we durnuklylygy üpjün etmekden netijeli nusga bolup durýandygyny aýtdy.
BMG-niň Baş sekretary Türkmenistanyň Hökümetiniň raýatsyzlygyny ýok etmek boýunça tagallalaryny we bu ugurdaky yzygiderli ädýän ädimleri üçin hoşallyk bildirdi.
Şol bir wagtyň özünde, taraplar Birleşen Milletler Guramasy bilen Türkmenistanyň arasyndaky hyzmatdaşlygy ösdürmek, şeýle hem Owganystan ýaly sebitdäki parahatçylyk we howpsuzlyk meseleleri boýunça pikir alyşdylar. Bu nukdaýnazardan owgan halkyna yzygiderli berilýän kömek we goldaw ýokary baha berildi.
Taraplar BMG-nyň Baş sekretarynyň şu ýylyň iýul aýynda Türkmenistana amala aşyran saparynyň we Türkmenistanyň Prezidenti Serdar Berdimuhamedow we türkmen halkynyň milli lideri, Türkmenistanyň Halk Maslahatynyň Başlygy Gurbanguly Berdimuhamedow bilen geçirilen duşuşyklaryň üstünlikli guralandygy bellediler. BMG-niň Baş sekretary bu saparyň ýokary guramaçylyk derejesi we myhmansöýerlik üçin minnetdarlyk bildirdi.
Türkmen tarapy hemişelik bitaraplayk derejesine eseslanýan daşary syýasat ugruny durmuşa geçirmäge ygrarlydyklaryny belledi. Şunuň bilen baglylykda, Türkmenistanyň Prezidentiniň geçen ýyl Baş Assambleýada öňe süren Ählumumy howpsuzlyk strategiýasyny taýýarlamak boýunça başlangyjy durmuşa geçirmekde BMG bilen ysnyşykly hyzmatdaşlyk etmäge taýýardygy bellenildi.
Türkmenistan wekiliýeti Owganystan meselesine hem degip geçip, 11-nji sentýabrda türkmen-owgan serhedindäki iri ulag-energetika taslamalaryň durmuşa geçirilmeginiň Owganystanyň halkyna goldaw bermek syýasatynyň mysaly bolup durýandygy aýdyldy. Bu taslamalaryň halkara hukuk kadalaryna laýyklykda, durmuşa geçiriljekdigi bellenildi.
Raýatsyzlygy ýok etmek babatdaky işlere ýokary baha berlendigi üçin minnetdarlyk bildiren türkmen tarapy ynsanperwer ugruň Türkmenistanyň syýasatynyň hem-de BMG bilen hyzmatdaşlygyň esasy ugurlarynyň biridigi bellenildi.