Türkmenistanyň futzal boýunça milli ýygyndysy “CAFA Futsal Cup-2023” halkara ýarynyşynyň çäginde ilkinji ýeňşini gazanmagy başardy. Halkara ýaryşynyň birinji tapgyrynyň çäginde Eýranyň milli ýygyndysy bilen duşuşan ýygyndy toparymyz güýçli garşydaşyny 2:1 hasabynda ýeňlişe sezewar etdi.
Ýygyndy toparymyza ýeňiş getiren toplary Gylyçmyrat Gylyçmyradow bilen Maksat Soltanow öz atlaryna ýazdyrdylar. Aziýa yklymynyň iň güýçli topary hasaplanylýan Eýranyň ýygyndy toparyndan üstün çykan Türkmenistanyň milli ýygyndysy toplan üç utugy bilen halkara ýaryşynda ýeňiş gazanmak mümkinçiligini artdyrdy.
Ýygyndy toparymyz halkara ýaryşyndaky ikinji duşuşygyny 24-nji iýulda Täjigistanyň ýygyndy toparynyň garşysyna geçirer.
Merkezi Aziýa wekilçilik edýän milli ýygyndylaryň arasyndaky ilkinji halkara ýaryşy Merkezi Aziýanyň futbol Assosiasiýasy tarapyndan geçirilýändigini ýatladýarys.
Halkara ýaryşy 23-30-njy iýul aralygynda Duşenbe (Täjigistan) şäherinde dowam eder. Baş baýrak ugrunda biziň milli ýygyndy toparymyzdan başga Täjigistanyň, Eýranyň, Özbegistanyň, Gyrgyzystanyň hem-de Owganystanyň milli ýygyndylary bäsleşerler.
Bir aýlawdan ybarat boljak «CAFA Futsal Cup-2023» halkara ýaryşynyň çäginde duşuşyklaryň 15-si geçiriler. Ýeňiji gazanylan utuklaryň sany boýunça kesgitlener.
Bu halkara ýaryşyndaky çykyşy ýygyndy toparymyz üçin şu ýylyň 7-11-nji oktýabry aralygynda Taýlandda geçiriljek Aziýa Kubogy-2024-iň saýlama tapgyryna taýýarlygy bolar. Saýlama tapgyrynda “A” toparçada çykyş edýän milli ýygyndymyzyň garşydaşlarynyň Taýlandyň, Gonkongyň hem-de Hytaýyň milli ýygydylarydygyny ýatladýarys.