Şu gün Moskwa-Türkmenabat-Moskwa ugry boýunça ýörite uçar gatnawy amala aşyryldy. Bu barada Russiýa Federasiýasynyň Türkmenistandaky ilçihanasy habar berýär.
Russiýanyň ilçihanasynyň berýän maglumatyna görä, Moskwa-Türkmenabat-Moskwa ugry boýunça ýerine ýetirilen ýörite gatnaw arkaly türkmen tarapynyň satyn alan koronawirus ýokanjyna garşy işlenip taýýarlanan rus “Sputnik Laýt” sanjymy Türkmenistana getirildi.
Mälim bolşy ýaly, 2021-nji ýylyň 23-nji dekabrynda Türkmenistanyň Saglygy goraýyş we derman senagaty ministrligi “Sputnik Laýt” waksinasyny bellige aldy hem-de degişli şahadatnamany berdi.
Häzirki wagtda Russiýa Federasiýasynyň “Sputnik Laýt” waksinasy 15 ýurtdan gowragynda belgä alyndy we ýene 30 ýurtda bu waksinanyň bellige alynmagy dowam edýär.
Mundan başga-da, Russiýada öndürilen COVID-19 ýokanjyna garşy öndürilen “EpiVacCorona” we “Sputnik-V” sanjymlary hem Türkmenistanda resmi taýdan bellige alyndy.
Türkmenistanyň Saglygy goraýyş we derman senagaty ministrligi Russiýa Federasiýasynyň öňdebaryjy wirusologiýa merkezleri bilen işjeň hyzmatdaşlyk edýär, «Sputnik Laýt» sanjymynyň Türkmenistanda hasaba alynmagy bolsa, iki ýurduň ýokanç keselleriniň ýaýramagyna garşy göreşmek ulgamyndaky ysnyşykly özara gatnaşyklarynyň netijesi bolup durýar.