Ministrler Kabinetiniň nobatdaky sanly wideoaragatnaşyk arkaly mejlisinde sport ulgamynda ýurdumyzyň alyp barýan hyzmatdaşlygy barada hasabat berildi.
Hasabatlardan görnüşi ýaly, Türkmenistan gysga wagtda halkara sport hyzmatdaşlygynyň merkezine öwrüldi. Soňky ýyllaryň dowamynda Diýarymyzda sebit, yklym we dünýä derejesinde iri sport bäsleşikleriniň 16-sy geçirildi. Olaryň hatarynda Ýapyk binalarda we söweş sungaty boýunça V Aziýa oýunlary möhüm orun eýeleýär.
Bu ugurda birnäçe teklipler taýýarlandy. Häzirki wagtda ýurdumyz Olimpiýa nyşanyny goramak baradaky Naýrobi şertnamasy we sportda dopinge garşy göreş boýunça halkara konwensiýasyna gatnaşýar. Şunuň bilen birlikde Türkmenistan 19 döwlet bilen sport babatda hyzmatdaşlyk hakynda resminamalara gol çekildi.
Ýurdumyzyň Ýewropanyň ýaryşlaryny dolandyrmak baradaky konwensiýana, Halkara sambo federasiýasy we Halkara tenis federasiýa bilen hyzmatdaşlyk etmek baradaky ähtnamalaryň, Hytaý Halk Respublikasynyň Milli Olimpiýa komiteti, Koreýa Respublikasynyň Sport we olimpiýa komitet bilen hyzmatdaşlyk etmek hakyndaky ähtnamalaryň taýýarlanyp, ýakyn wagtda olara gol çekmek teklip edilýär.
Şeýle hem Türkmenistanyň Halkara sport medisina federasiýasynyň agzalygyna girmegi barada işlere girişmek göz öňünde tutulýar. Geljek ýyllarda Türkmenistanda ÝUNESKO-nyň howandarlygynda Bedenterbiýe we sporta jogapkär ministrleriň halkara maslahatyny, Halkara Olimpiýa komitetiniň sessiýasyny hem-de Aziýa Olimpiýa Geňeşiniň Baş Assambleýasyny geçirmek teklip edildi.
Bulardan başga-da Olimpiýa hartiýasyna hem-de Aziýanyň Olimpiýa Geňeşiniň resminamalaryna esaslanyp, Türkmenistanyň Milli Olimpiýa komitetiniň tertipnamasyny we işini kämilleşdirmek meýilleşdirilýär.
Hormatly Prezidentimiz hasabaty diňläp, köpçülikleýin bedenterbiýe-sagaldyş hereketini we ýokary netijeli sporty ösdürmegiň Bitarap Watanymyzyň döwlet syýasatynyň ileri tutulýan ugurlarynyň biridigini belledi.