Türkmenistan Şanhaý Hyzmatdaşlyk Guramasynyň ykdysady taslamalaryna gatnaşmaga taýýardyr. Bu barada Türkmenistanyň Prezidenti Serdar Berdimuhamedow guramanyň döwlet Baştutanlarynyň geňeşiniň 23-nji maslahatynda eden çykyşynda belläp geçdi.
“mir24.tv” neşiriniň habar bermegine görä, şu gün Hindistanyň Premýer-ministri Narendra Modiniň başlyklyk etmeginde Şanhaý Hyzmatdaşlyk Guramasyna (ŞHG) agza ýurtlaryň döwlet Baştutanlarynyň geňeşiniň 23-nji maslahaty geçirildi. Onlaýn tertipde geçirilen sammite Türkmenistanyň Prezidenti Serdar Berdimuhamedow hormatly myhman hökmünde gatnaşdy.
– Bu foruma gatnaşmagy Türkmenistana hem-de onuň daşary syýasat ugruna goýulýan hormatyň nyşany hökmünde garaýarys. Türkmenistan üçin ŞHG bilen gatnaşyklar halkara hyzmatdaşlyk strategiýasynyň esasy bölegi hasaplanýar – diýip, Türkmenistanyň Prezidenti belläp geçdi.
Türkmenistanyň Prezidenti öz gezeginde ŞHG-niň ykdysadyýet, maýa goýum, ulag, energetika we beýleki ugurlardaky hyzmatdaşlyk başlangyçlaryna uly gyzyklanma bildirýändigini belledi.
Döwlet Baştutany ŞHG-niň ýurtlarynyň güýçli serişde önümçilik kuwwatynyň bardygyny mälim etdi.
2001-nji ýylyň 15-nji iýunynda döredilen ŞHG guramasyna 6 ýurt – Russiýa, Gazagystan, Gyrgyzystan, Hytaý, Täjigistan we Özbegistan agza boldy. 2017-nji ýylda bu gurama Hindistan bilen Pakistan goşuldy. Şu gezekki sammitde bolsa, Eýran bu gurama agza boldy.