Türkmenistan bilen Özbegistanyň arasyndaky söwda-ykdysady gatnaşyklar yzygiderli ösdürilýär. Muňa iki ýurduň arasyndaky haryt dolanyşygynyň görkezijileri hem aýdyň şaýatlyk edýär.
Özbegistanyň Döwlet statistika edarasynyň maglumatyna görä, Türkmenistan Özbegistanyň iri söwda hyzmatdaşlarynyň biridir. 2022-nji ýylyň ýanwar-noýabr aýlarynda haryt dolanyşygy 858.6 million dollara deň boldy.
Bu görkezijilerde Türkmenistanyň Özbegistana eksporty agdyklyk edýär. Degişli hasabat döwründe Türkmenistan Özbegistana 674.3 million dollar möçberinde dürli harytlaryň eksportuny amala aşyrdy. Şol döwürde Özbegistanyň eksporty bolsa 184,3 million dollara deňeçär boldy.
2022-nji ýylyň 11 aýynyň dowamynda iki goňşy ýurduň arasyndaky haryt dolanyşygy 12,7 göterim artdy.
Şol bir wagtda Özbegistan tarapy iki ýurduň arasynda gazanylan ylalaşyga laýyklykda, serhetýaka söwda merkezini döretmek taslamasynyň gysga wagtda durmuşa geçirilmegi ugrunda tagalla edýär.
Mundan başga-da, Özbegistanyň eksport harytlaryny Türkmenistanyň üsti bilen daşary ýurt bazaryna ibermek üçin degişli işler ýola goýuldy. Özbek tarapy Türkmenistanyň ulag-logistika mümkinçiliklerinden peýdalanyp, özüniň eksport harydyny Türkmenbaşy halkara deňiz porty arkaly Ýewropa bazaryna çykarýar.