Türkmenistanyň futzal boýunça zenanlar ýygyndy topary Merkezi Aziýa futbol assosiasiýasynyň (CAFA) guramagynda geçirilýän futzal boýunça zenanlar ýygyndylarynyň arasyndaky çempionatda ilkinji duşuşygyny geçirdi.
CAFA-nyň çempionatyna Türkmenistanyň ýygyndy toparyndan başga Täjigistanyň, Eýranyň, Özbegistanyň hem-de Gyrgyzystanyň milli ýygyndylary gatnaşýarlar.
Türkmenistanyň milli ýygyndysynyň çempionatyň ilkinji tapgyrynda Gyrgyzystanyň ýygynydy topary bilen geçiren duşuşygy 1:1 hasabynda deňlikde tamamlandy. Birinji oýun gününiň beýleki duşuşygynda Eýranyň ýygyndy topary uly hasap bilen Özbegistanyň milli ýygyndysyny ýeňlişe sezewar etdi – 9:0.
Ýygyndy toparymyz çempionatdaky ikinji duşuşygyny 10-njy fewralda Özbegistanyň ýygyndy toparynyň garşysyna geçirer. Bu duşuşyk Aşgabat wagty bilen 16:00-da başlanar.
Ýeri gelende bellesek, halkara ýaryşy Duşenbe şäheriniň tennis we suw görnüşleri köpugurly sport toplumynda geçirilýär.