Şu gün Özbegistanyň taryhy Samarkant şäherinde Garaşsyz Döwletleriň Arkalaşygyna girýän ýurtlaryň daşary syýasat edaralarynyň ýolbaşçylarynyň geňeşiniň nobatdaky mejlisi geçirildi. Üstümizdäki ýylda GDA başlyklyk edýän Gyrgyz Respublikasynyň ýolbaşçylygynda geçirilen duşuşyga Türkmenistanyň daşary işler ministriniň orunbasary Wepa Hajiýewiň ýolbaşçylygyndaky wekiliýet gatnaşdy.
Özbek neşirleriniň habayrna görä, bu duşuşyga Özbegistanyň daşary işler ministri Baht’ýor Saidow, Gyrgyz Respublikasynyň daşary işler ministri Žeenbek Kulubavew, Azerbaýjanyň daşary işler ministriniň orunbasary Halaf Halafow, Gazagystanyň daşary işler ministri Murat Nurtleý, Russiýanyň daşary işler ministri Sergeý Lawrow, Täjigistanyň daşary işler ministri Sirojiddin Muhriddin, Ermenistanyň daşary işler ministri Ararat Mirzoýan, GDA-nyň baş sekretayr Sergeý Lebedew gatnaşdy.
Daşary işler ministrlikleriniň ýolbaşçylary halkara gün tertibindäki möhüm meseleler we Arkalaşygyň formatyndaky özara gatnaşyklar barada pikir alyşdylar. Ministrler Geňeşiniň indiki mejlisiniň geçiriljek senesi we ýeri barada karar berildi. 2023-nji ýylyň 12-nji oktýabrynda Bişkekde bolar.