Eýran Yslam Respublikasynyň paýtagty Tähran şäherinde geçirilen ykdysady hyzmatdaşlyk boýunça türkmen-eýran hökümetara toparynyň 18-nji mejlisi geçirildi. Ykdysady hyzmatdaşlyk boýunça türkmen-eýran hökümetara toparynyň 18-nji mejlisinde türkmen tarapyna Türkmenistanyň Ministrler Kabinetiniň Başlygynyň orunbasary, daşary işler ministri Raşid Meredow, eýran tarapyna bolsa, Eýran Yslam Respublikasynyň ýol we şäher ösüşi ministri hanym Farzaneh Sadeghi Malwajerd başlyklyk etdi.
Mejlisiň dowamynda iki ýurduň arasyndaky söwda-ykdysady we medeni-ynsanperwer ugurlardaky hyzmatdaşlyk gatnaşyklary giň gerimde ara alnyp maslahatlaşyldy.
Türkmenistanyň Ministrler Kabinetiniň Başlygynyň orunbasary, daşary işler ministri Raşid Meredow öz çykyşynda energetika pudagynda, hususan-da, tebigy gazyň we elektrik energiýasynyň Eýrana we bu ýurduň üsti bilen üçünji döwletlere ibermegiň mümkinçilikleri barada belläp geçdi.
Türkmenistanyň elektrik energiýasyny Eýrana ibermegiň dowam etdirilýändigi bellenilip, “Geçen ýyl biz Eýrana 1.987 milliard kilowat-sagat elektrik toguny iberdik. 2025-nji ýylyň birinji ýarymynda bu görkeziji 900 million kilowat-sagada deň boldy” – diýip, türkmen tarapy belledi.
Türkmenistanyň wekiliýeti elektrik energiýasyny Eýranyň üsti bilen beýleki döwletlere ibermäge gyzyklanma bildirilýändigini belledi. Bu ugurda Türkiýe Respublikasy bilen degişli tejribe toplanyldy. 155 kilometrlik Mary-Maşat elektirk geçirijisi taslamasy durmuşa geçiriler.