Şu gün Türkmenistanyň Prezidenti Balkan welaýatyna toý sapary bilen gitdi. Bu ýerde Türkmenistanyň Prezidenti «Awaza» milli syýahatçylyk zolagynda Ministrler Kabinetiniň göçme mejlisini geçirdi.
“Watan” habarlar gepleşiginde bellenilip geçilişi ýaly, Ministrler Kabinetiniň Başlygynyň orunbasary, daşary işler ministri R.Meredow Türkmenistanyň, Azerbaýjan Respublikasynyň we Türkiýe Respublikasynyň döwlet Baştutanlarynyň sammitine taýýarlyk görşi barada hasabat berdi.
Ýurdumyzda 2022-nji ýylda geçiriljek halkara çäreleriň meýilnamasynda Türkmenistanyň, Azerbaýjanyň we Türkiýäniň döwlet Baştutanlarynyň üçtaraplaýyn sammiti aýratyn orun eýelýär. Häzirki wagtda bu ýurtlary köpugurly hyzmatdaşlygyň çäklerinde dürli ulgamlarda giň gerimli bilelikdäki işler amala aşyrylýar.
Şunda energetika, ulag-logistika, söwda-ykdysady ulgamlar, şeýle hem üçtaraplaýyn gatnaşyklarda ýokary tehnologiýalaryň ornaşdyrylmagy ugrundaky tagallalaryň birleşdirilmegine-de uly ähmiýet berilýär.
Şunuň bilen bir hatarda döwletara medeni-ynsanperwer gatnaşyklaryna aýratyn üns berilýär.
Häzirki wagtda Türkmenistanyň, Azerbaýjanyň we Türkiýäniň döwlet Baştutanlarynyň üçtaraplaýyn sammitini ýokary guramaçylyk derejesinde taýýarlamak boýuna degişli işler alnyp barylýar.