«Türkmenhowaýollary» agentligi nobatdaky ýörite uçuşyny 17-nji martda amala aşyrdy. Bu uçuş bilen koronowirus pandemiýasy sebäpli, Täjigistanda galan ýurdumyzyň 179 raýaty Türkmenabat şäheriniň Halkara howa menziline getirildi. Olaryň 168-si dostlukly döwletiň ýokary okuw mekdeplerinden uçurym bolan ýaşlardyr.
Ýörite uçuşyň guramaçylary tarapyndan ýolagçylar Duşenbe şäheriniň halkara howa menzilinde uçara münmezden ozal koronowirus barlagyndan geçirildi. Barlaglaryň netijesine laýyklykda, ýokançlygyň alamaty bolmadyk ýolagçylara ýurdumyza gelmäge rugsat berildi.
Muňa garamazdan, Bütindünýä Saglygy goraýyş guramasynyň talaplaryna laýyklykda, ýörite uçar bilen ýurdumyza getirilen raýatlarymyz üç hepdelik karantin gözegçiligine alyndy.
«Türkmenhowaýollary» ýakyn günlerde Özbegistandan hem şeýle uçuşy amala aşyrmagy meýilleşdirýär.