Türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow Birleşen Arap Emirliklerine amala aşyran iş saparynyň ikinji gününde Dubaý şäherinde birnäçe duşuşyklar geçirdi.
“Watan” habarlar gepleşiginde bellenilip geçilişi ýaly, türkmen halkynyň Milli Lideri “Dubai Aviation Corporation” (Flydubai) kompaniýasynyň täjirçilik direktory Hamad Obaýdalla bilen duşuşygy boldy. Duşuşykda awiasiýasy ulgamyndaky ikitaraplaýyn hyzmatdaşlyk gatnaşyklary barada pikir alyşdylar.
Dubaýyň awiasiýasy korporasiýasynyň täjirçilik direktory Hamad Abaýdullla BAE-niň kompaniýalarynyň Türkmenistan bilen hyzmatdaşlyga uly gyzyklanma bildirýandigini belledi.
Şeýle hem duşuşygyň barşynda iki ýurduň arasynda howa gatnawlarynyň sanynyň artdyrylmagy babatda teklipler beýan edildi. 2010-njy ýylda Türkmenistan Merkezi Aziýada BAE bilen yzygiderli howa gatnawlaryny ýola goýan ýurtlaryň ilkinjisi boldy.
iki ýurduň arasyndaky awiasiýa ulgamyndaky hyzmatdaşlygyň çäklerinde Aşgabat-Dubaý-Aşgabat gatnawlary amala aşyrylýar. Şu gün bolsa, Abu-Dabä gatnawlar ýola goýuldy. Bu hem iki ýurduň arasyndaky söwda-ykdysady gatnaşyklaryň işjeňleşdirilmegine ýardam eder.
Duşuşyk tamamlanandan soňra türkmen halkynyň Milli Lideriniň gatnaşmagynda Türkmenistanyň Ministrler Kabinetiniň ýanyndaky Ulag we kommunikasiýalar agentliginiň «Türkmenhowaýollary» agentliginiň hem-de Dubaýyň awiasiýasy korporasiýasynyň arasynda özara düşünişmek hakynda ähtnama gol çekmek dabarasy boldy.
Ähtnama laýyklykda taraplar «Flydubai» ygtyýarnama merkezinde uçarmanlar üçin okuw hyzmatlaryny bermek mümkinçiligine garamakçy. Okuw «Boeing 737» kysymly uçarda geçiriler.
«Türkmenhowaýollary» agentligi «Boeing 737» kyysmly uçarlary üçin uçarmanlary taýýarlamak boýunça degişli tarap bilen uzakmöhletli işleşmek isleýär.
«Flydubai» Ýakyn Gündogardaky iň uly awiakompaniýalaryň biridir. Kompaniýanyň ýokary derejeli uçarmanlary ýetişdirmekde hem baý tejribesi bar. Munuň üçin onuň binýady döwrebap okuw merkezleri bilen üpjün edilendir.
Özara düşünişmek hakynda Ähtnama gol çekilmegi Türkmenistan bilen BAE-nyň arasynda raýat awiasiýasy pudagynda hyzmatdaşlygy ösdürmekde möhüm ädimdir.