Şu ýylyň ýanwar aýynyň 13-17-si aralygynda Gazagystan Respublikasynda geçirilýän matematika, fizika we informatika dersleri boýunça XVI halkara Žautykow olimpiadasyna ýurdumyzyň mekdep okuwçylaryndan saýlanan topar hem gatnaşýar. Bu barada Türkmenistanyň Gazagystandaky ilçihanasy habar berýär.
“IZho 2025” halkara olimpiadasyna 15 döwletden 700-e golaý mekdep okuwçylary we 150 ýolbaşçy gatnaşýar.
Gazagystan, Gyrgyzystan, Özbegistan, Täjigistan, Russiýa, Belarus, Ermenistan, Azerbaýjan, Türkiýe, Gruziýa, Bolgariýa, Rumyniýa, Serbiýa we Mongoliýa ýaly döwletler bilen bir hatarda Türkmenistan hem bu olimpiadada mynasyp wekilçilik edýär.
Olimpiada Gazagystan Respublikasynyň Ylym ministrliginiň ýanyndaky “Daryn” Respublikan ylmy- tejribe merkeziniň we Astana şäher häkimliginiň howandarlygynda Respublikan fizika-matematika mekdebinde geçirilýär.
Žautykow olimpiadasynyň jemleri boýunça gatnaşyjylara ýadygärlik sowgatlary, ýeňiji bolanlara dürli derejedäki şahadatnamalar, altyn, kümüş we bürünç medallar gowşurylar.