Türkmen we özbek halklarynyň arasyndaky dostluk uzak taryhdan gözbaş alýar. Ýurdumyzyň demirgazyk sebitinde 16-17-nji noýabrda geçiriljek türkmen we özbek halklarynyň dostluk festiwaly ikitaraplaýyn gatnaşyklaryň has-da berkeýändigini alamatlandyrýar. Şu gün — 15-nji noýabrda bolsa festiwala gatnaşyjy myhmanlar «Köneürgenç» taryhy-medeni döwlet goraghanasynyň ýadygärlikler toplumyna baryp gördüler.
Soňky ýyllarda Gahryman Arkadagymyzyň hem-de Arkadagly Serdarymyzyň baştutanlygynda Türkmenistan bilen Özbegistanyň arasyndaky syýasy, söwda-ykdysady we mednei-ynsanperwer gatnaşyklar yzygiderli ösdürilýär.
Hormatly Prezidentimiziň parahatçylyga, ynanyşmaga esaslanýan daşary syýasaty türkmen-özbek gatnaşyklarynyň taryhynda täze döwre badalga berdi.
Hormatly Prezidentimiziň hem-de Özbegistan Respublikasynyň Prezidentiniň gatnaşmaklarynda paýtagtymyzdaky «Daşkent» dynç alyş seýilgähiniň açylyş dabarasy, şeýle hem teleköpri arkaly Türkmen-özbek serhetýaka söwda zolagynyň — Söwda merkeziniň düýbüniň tutulmagy iki ýurduň arasynda ýola goýulýan medeni, söwda-ykdysady hyzmatdaşlygyň barha pugtalanýandygynyň nobatdaky subutnamasyna öwrüldi.
Ine şu günler Daşoguz welaýatynda badalga alýan Türkmen we özbek halklarynyň dostluk festiwaly bolsa bu iki halkyň gadymy dost-doganlyk ýörelgesiniň dowamatynyň dowam bolýandygyny alamatlandyrýar.
Türkmenistan bilen Özbegistan Respublikasynyň arasyndaky diplomatik gatnaşyklar 1993-nji ýylyň 7-nji fewralynda ýola goýuldy. 2010-njy ýylda Daşoguz welaýatynda geçirilen dostluk festiwaly asyrlaryň dowamynda kemala gelen türkmen-özbek gatnaşyklaryndaky hoşniýetliligiň, raýdaşlygyň belent dabaralanmasy boldy.
Ürgenç şäherinde Türkmen-özbek dostluk öýüniň açylmagy döwletara hyzmatdaşlygyň möhüm ugry bolan medeni-ynsanperwer gatnaşyklaryň pugtalandyrylmagynda uly orun eýeledi. Aşgabatdaky «Daşkent» seýilgähiniň we Daşkentdäki «Aşgabat» seýilgähiniň özbek-türkmen dostlugynyň hem-de hoşniýetli goňşuçylygynyň aýdyň nyşanlary bolandyklaryny aýratyn nygtamak zerur.
Saparmuhammet ATAÝEW,
S.A.Nyýazow adyndaky Türkmen oba hojalyk uniwersitetiniň talyby.