Golaýda ýurdumyzda saparda bolan Gyrgyz Respublikasynyň Prezidenti Sadyr Žaparow hormatly Prezidentimize resmi hat iberdi. Şol hatda Gyrgyz Respublikasynyň Prezidenti milli Liderimizi jogap sapar bilen Gyrgyzystana çagyrdy.
Şol resmi hatda hususan-da şeýle diýilýär:
– Türkmenistana bolan resmi saparymyň ýokary derejede guralandygy hem-de gyrgyz wekiliýetine bildirilen myhmansöýerlik üçin tüýs ýürekden hoşallyk bildirýärin.
Saparyň çäklerinde guralan çäreleriň, hususan-da, Siziň bilen ikitaraplaýyn duşuşyklaryň netijeli hem-de özara ynanyşmak ýagdaýynda geçmegi gyrgyz-türkmen doganlyk gatnaşyklarynyň ösüşinde ýene-de bir taryhy tapgyr boldy. Gepleşikleriň barşynda gazanylan ylalaşyklaryň käbiriniň eýýäm durmuşa geçirilip başlandygyna örän şatdyryn.
Gyrgyz Respublikasy bilen Türkmenistanyň arasyndaky doganlyk gatnaşyklarynyň hem-de strategik hyzmatdaşlygyň iki halkyň abadançylygynyň bähbidine mundan beýläk-de giňeldiljekdigine we ösdüriljekdigine ynanýaryn.
Pursatdan peýdalanyp, Sizi Gyrgyz Respublikasyna özüňiz üçin islendik amatly wagtda jogap sapary bilen gelmäge çagyrýaryn.