Türkmen halkynyň Milli Lideri, Türkmenistanyň Halk Maslahatynyň Başlygy Gahryman Arkadagymyz şu gün, 14-nji iýunda Ahal welaýatyna iş saparyny amala aşyrdy.
Milli Liderimiz Ahal welaýatynyň Ak bugdaý etrabynyň çäginde ýerleşýän «Bugdaýly tejribe-tohumçylyk» daýhan birleşigine bardy we bu ýerde GDA-nyň tohumçylyk meseleleri boýunça Hökümetara utgaşdyryjy geňeşiniň başlygynyň orunbasary, «Semena» assosiasiýasynyň prezidenti I.Kuzmin bilen söhbetdeş boldy.
Şeýle-de bu ýerde Ministrler Kabinetiniň Başlygynyň obasenagat toplumyna gözegçilik edýän orunbasary A.Ýazmyradow, Ahal welaýatynyň häkimi Ý.Gurbanow, ýurdumyzyň harby we hukuk goraýjy edaralarynyň Hojalyk müdiriýetiniň başlygy Ç.Amanow hem-de alym-agronomlar boldular.
Ýurdumyza gelen myhman I.Kuzmin bilen gürrüňdeşlikde Türkmenistanyň ekerançylyk meýdanlarynda alnyp barylýan işleriň ýokary halkara görkezijilerine we agrotehnikanyň talaplaryna doly laýyk gelýändigi nygtaldy. Oba hojalykçylar, alym-agronomlar topragyň hasyllylygyny artdyrmak, täze ýerleri özleşdirmek işlerini häzirki zamanyň ylmy esasynda alyp barýarlar.
Şeýle-de türkmen halkynyň Milli Lideri daýhan birleşigiň kärendeçisi Ç.Annaýew bilen söhbetdeş bolup, onuň ekin meýdanlary, maşgala ýagdaýlary bilen gyzyklandy we oňa birnäçe maslahatlaryny berdi hem-de daýhanyň çekýän asylly zähmetine minnetdarlygyň nyşany hökmünde sowgatlary gowşurdy.