Ozal hem habar berşimiz ýaly, türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow Amerikanyň Birleşen Ştatlarynda saparda boldy. Örän uly wakalara hem-de netijeliligi bilen häsiýetlenen saparynyň çäklerinde türkmen halkynyň Milli Lideri Gurbanguly Berdimuhamedow “Al-Arabiýa” teleýaýlymynyň esasy alypbaryjysy Rizwan Han bilen söhbetdeş boldy. Bu barada “Watan” habarlar gepleşiginde habar berildi.
“Al-Arabiýa” teleýaýlymynyň esasy alypbaryjysy Rizwan Han türkmen halkynyň Milli Liderine Amerikanyň Birleşen Ştatlarynyň saparynyň maksady, syýasy, söwda-ykdysady, energetika, ylym-bilim we ynsanperwer ugurlarda birnäçe möhüm sowallar bilen ýüzlendi.
Hususan-da, meşhur alypbaryjy “Transhazar” gaz geçirijisiniň geljegi baradaky sowal bilen ýüzlendi.
Türkmen halkynyň Milli Lideri bu sowala şeýle jogap berdi.
– Biz bu taslamany energetika akymyny diwersifikasiýa etmegiň hem-de yklymda energetika howpsuzlygyny gazanmagyň möhüm ugurlarynyň biri hökmünde görýäris. Türkmenistan oňa çynlakaý, ünsli we oňyn garaýar. Şol bir wagtda halkara-hukuk häsiýetli, ylaýta-da Hazar deňziniň düýbüni delimitasiýa etmek meselesini çözmek zerurdyr. Birnäçe wagt mundan ozal bu mesele bilen meşgullanmak üçin türkmen-azerbaýjan Iş topary döredildi. Bu toparyň işiniň amaly taýdan gowy netijeleri berjekdigine umyt edýäris.