2024-nji ýylyň aprel aýynyň 22-ine Türkmenistanyň Çeperçilik sergiler müdirliginiň we şekilendiriş sungatynyň sergi merkeziniň Türkmenistanyň Suratkeşler birleşigi bilen bilelikde gurnamaklarynda Türkmen bedewiniň milli baýramy mynasybetli “Atym bar-ganatym bar” atly ýurdumyzyň suratkeşleriniň amaly-haşam sungat eserleriniň sergisi açyldy.
Sergi Türkmenistanyň Suratkeşler birleşiginiň agzalarynyň, Türkmenistanyň Döwlet çeperçilik akademiýasynyň mugallymlarynyň hem-de erkin suratkeşleriniň gatnaşmaklarynda gurnaldy.
Sergide suratkeşlerleriň 125-den gowrak işleri görkezilip, olardan nakgaş, heýkeltaraş, grafika ýaly sungat eserleri hem bar. Bu sungat eserlerinde bagtyýar döwrümiziň waspy, ýelden ýyndam ahalteke atlarymyzyň çeper keşbi şahyrana wasp edilen bolsa, türkmeniň şöhratly taryhyndan söz açýan täsin suratlar gadymyýetden şu güne nazar salýar.
“Pähim- paýhas ummany Magtymguly Pyragy” ýylynda özboluşly gözelligi bilen älem-jahany haýrana goýýan bedewlerimiziň waspyny ýetirýän sergi-myhmanlarda ýakymly täsirleri galdyrdy.
Sergi 10 gün dowam edýär.
Bägül Kakalyýewa,
Türkmenistanyň Daşary işler ministrliginiň
Halkara gatnaşyklary institutynyň talyby.