Türkiýe bilen Türkmenistan Azerbaýjanyň gatnaşmagynda ikitaraplaýyn hem-de üçtaraplaýyn derejede Transhazar geçelgesiniň çäginde multimodal ulagyň ösdürilmegi boýunça tagallalary çaltlandyrmagy meýilleşdirýär. Bu barada Türkiýäniň Aşgabatdaky ilçisi Ahmet Demirok metbugat ýygnagynda aýtdy.
«Men ulag ulgamyndaky gün tertibimize degişli käbir meseleleriň üstünde durmak isleýärin. Mälim bolşy ýaly, Transhazar ulag geçelgesi (Orta geçelge) howpsuz we amaly ugur hökmünde tapawutlanýar. Soňky döwürde ABŞ-nyň we Ýewropa Bileleşiginiň bu geçelgä bolan gyzyklanmasynyň artýandygyny kanagatlanma bilen belleýäris», – diýip diplomat aýtdy.
Onuň bellemegine görä, Türkmenistan türk harytlarynyň Merkezi Aziýa bazarlaryna iberilmegi üçin möhüm ugur bolup durýar, Türkiýe bolsa Türkmenistan üçin Ýewropa ugrunda ulag ulgamynda möhüm orny eýeleýär.
«Şu çäkde biz “Orta geçelgäniň” netijeliligini ýokarlandyrmak maksady bilen, multimodal ulagyň ösdürilmegi boýunça ikitaraplaýyn we Azerbaýjanyň gatnaşmagynda üçtaraplaýyn derejede alnyp barylýan tagallalaryň, şeýle-de amallary ýönekeýleşdirmek we tizleşdirmek boýunça çäreleriň has-da güýçlendirilmelidigini hasaplaýarys», – diýip Demirok nygtady.
Ilçi Türkmenistanyň ulag we logistika infrastrukturasyny ösdürmek boýunça edýän tagallalaryna ýokary baha berdi. Şeýle-de diplomat Türkiýäniň Hazar deňzinde ulag we deňiz infrastrukturasyny ösdürmek boýunça alnyp barylýan işleriň çäginde türkmen hyzmatdaşlary bilen hemişe hyzmatdaşlyga taýýardygyny belledi.