Italiýanyň milli çempionatynda “Milan” toparynda oýnan Hakan Çalhanogly bu ýurduň başga topary bolan “Inter” topary bilen 3 ýyllyk şertnama baglaşdy. Italiýanyň metbugatynyň habaryna görä, türk futbolçysy 5 million ýewro we goşmaça zähmet haklaryny alar.
“Inter” toparynyň “Twitter” jemgyýetçilik torunda bu transfer bilen baglanyşykly “Hoş geldiň Hakan” diýlip beýanat berildi. 27 ýaşyndaky futbolçy 2024-nji ýylyň 30-njy iýunyna çenli şertnama baglaşdy.
Çalhanogly Italiýanyň Milan şäherinde ýerleşýän bu toparyň sport desgalarynda lukmançylyk barlagyndan geçdi.
“Inter” topary öz düzümindäki Kristian Erikseniň Ýewropa çempionatynda huşuny ýitirip, hassahanada ýüreginden operasiýa geçirmeginden soňra onuň ornuna futbolçy gözläp başlady. Hakan Çalhanogly şonuň üçin bu toparyň orta gürpünde oýnajak esasy ýarymgoragçylaryň biri bolar.
2017-nji ýylda Germaniýanyň “Baýer” toparyndan Italiýanyň “Milan” toparynda geçen Hakan Çalhanogly 4 ýyl bu toparda oýnady.
Umuman, Milan şäheriniň “Milan” hem-de “Inter” toparlary biri-biriniň esasy bäsdeşleridir. Hakan Çalhanogly bu iki toparda oýnan 13-nji futbolçy boldy. Mundan ozal, bu iki toparda Kristian Wieri, Balotelli, Roberto Bajjo, Ernan Krespo, Patrik Wierra, Bonuççi, Alehandro Kassano, Edgar Dawids, Andreo Pirlo, Klerens Zedorf, Ronaldo (brazil) hem-de Zlatan Ibragimowiç dagylar oýnadylar.