ABŞ-nyň Prezidenti Donald Tramp baý maýadarlara 5 million dollara raýatlyk ýoluny açýan “altyn kart” wizasy hödürlejekdigini aýtdy. Bu täzemaksatnama soňky 35 ýyl bäri ulanylýan maýadarlara berilýän wiza maksatnamasynyň ornuny tutar.
Tramp Ak Tamda eden çykyşynda: “Olar baý, üstünlikli bolarlar, köp pul harçlarlar, köp salgyt tölerler we köp adamy iş bilen üpjün ederler. Biz munuň örän üstünlikli boljagyna ynanýarys” diýdi.
Täze “Trump Gold Card” EB-5 wizasynyň ornuny tutar
ABŞ-nyň söwda ministri Goward Latnik täze wizanyň iki hepdäniň içinde EB-5 maksatnamasynyň ýerine giriziljekdigini aýtdy. 1990-njy ýylda Kongres tarapyndan döredilen EB-5 maksatnamasy daşary ýurt maýa goýumlaryny çekmek üçin niýetlenipdi. Bu makstanama laýyklykda, daşary ýurtly maýadarlar azyndan 1 million dollar maýa goýup, 10 adamy iş bilen üpjün etmelidi.
Latnigiň aýtmagyna görä, “altyn karta” esasan ýaşyl karta (hemişelik ýaşamak hukugy) bolup, EB-5 bilen baglanyşykly galplyklary aradan aýyrmaga gönükdiriler. Şonuň bilen birlikde, bu maksatnama raýatlyk almagyň ýoluny hem açar.
ABŞ-da maýadar wizalarynyň täsiri
Içeri Howpsuzlyk departamentiniň migrasiýa statistikasynyň soňky hasabatyna görä, 2022-nji ýylyň 30-njy sentýabryna çenli 12 aýyň dowamynda takmynan 8000 adam EB-5 maýadar wizasyny aldy. Kongres Içerki barlag gullugynyň 2021-nji ýyldaky hasabatynda bu wizanyň galplyk töwekgelçiligini öz içine alýandygy, aýratyn-da maýa goýum serişdeleriniň kanuny çeşmeleriniň dogry tassyklanylmagynyň mesele bolup galýandygy aýdylýar.