Ýaponiýanyň Tokio şäherinde şu ýylyň ilkinji auksionynda Toýosu balyk bazarynda gök tunes balygy rekord bahadan — $3,2 milliona satyldy. Bu barada “Kyodo” neşiri habar berýär.
Agramy 243 kg bolan balyk Ýaponiýanyň demirgazyk-gündogaryndaky Aomori prefekturasynda tutuldy. Bu balygy suşi restoranlar ulgamyny dolandyrýan “Kiyomura” kompaniýasy satyn aldy.
“Kiyomura” kompaniýasynyň prezidenti Kýosi Kimuranyň pikirine görä, ýylyň ilkinji söwdalarynda esasy loty satyn almak bagt getirýär. “Şu ýylyň ilkinji tunes balygy bagt getirýär. Mümkin boldugyça köp adamyň ondan lezzet alyp, energiýa almagyna umyt edýäris,” — diýip, kompaniýanyň ýolbaşçysy aýtdy.
Tokio şäher häkimliginiň maglumatlaryna görä, şu ýylky teklip 1999-njy ýyldan bäri iň ýokary baha boldy. Ol 2019-njy ýylda goýlan öňki rekorddan — 333,6 million ýenden (takmynan $2,1 milliondan gowrak) ýokary boldy.