Amerikanyň Birleşen Ştatlarynda “TikTok” programmanyň applikasiýa dükanlaryndan aýrylmagy bilen, “eBay” platformasynda “TikTok” bilen üpjün edilen telefonlaryň satuwy barha ýokarlanýar. Satyjylar TikTok-yň gysga wagtlyk gadagançylygyndan peýdalanmak bilen, bu ýagdaýy öz bähbitlerine ulanyp başladylar.
“TikTok” programmasy mobil applikasiýa dükanlaryndan aýryldy we şenbe güni gysga wagtlyk işlemedi. Prezident Donald Tramp bu gadagançylygy 75 gün yza süýşürýän ýörite karara gol çekeninden soň, programma 12 sagadyň dowamynda öňki ulanyjylar üçin täzeden elýeterli boldy, ýöne programmanyň dükanlardan göçürip almagy entek mümkin däl.
Bu ýagdaýyň dowamynda “eBay”-da döredijilikli satyjylar “TikTo”k bilen üpjün edilen telefonlary satmaga girişdiler. Habar gulluklarynyň beren maglumatyna görä, müňlerçe “eBay” sanawynda “TikTok” bilen üpjün edilen telefonlar peýda boldy.
Telefonlaryň bahalary has ýokary
“eBay” platformasynda bu telefonlaryň bahalary ýüzlerçe dollardan müňlerçe dollara çenli üýtgeýär. Käbir satyjylar hatda million dollar töweregi baha bilen sanawlary hödürleýär. Mysal üçin, $21000 bilen görkezilen bir sanaw satylan hökmünde bellendi, ýöne bu bahanyň hakyky bolmagynyň ahmaldygyna şübhe bar, sebäbi satyjylar müşderilerden has pes teklipleri kabul edip bilerler.
Penşenbe güni günortan sagatlaryna çenli “eBay”-da “TikTok telefony” diýen gözleg 27000-den gowrak netijäni görkezdi.
“TikTok”, “eBay”, “Apple” we “Google” bilen bagly soraglara CNN-e jogap bermekden saklandy.
TikTok applikasiýa dükanlarynda haçan elýeterli bolar?
“TikTok”-nyň applikasiýa dükanlaryndan aýrylmagy bilermenler tarapyndan öňünden çaklanan waka bolsa-da, onuň indiki ädimleriniň nähili boljakdygy belli däl. Gadaganlyk “TikTok”-yň tehnologiýa hyzmatdaşlarynyň programmany elýeterli etmegini gadagan edýär we bu düzgünleri bozýanlara adam başyna $5000 jerime salynar. Bu Amerikanyň Birleşen Ştatlarynda “TikTok”-yň mazmunyny saklaýan “Oracle”, şeýle hem applikasiýa dükanlarynda programmany hödürleýän “Apple” we “Google” üçin hem degişli.
“TikTok”-yň Amerikadaky geljegi heniz hem näbelli. “ByteDance” kompaniýasy bu programmany satmak niýetiniň ýokdugyny öňräk yglan eden bolsa-da, häzirki wagtda amerikan kompaniýasy bilen gepleşiklere başlandygyny aýdýar. Şeýle-de bolsa, bu ýagdaýyň çözgüdi entek anyk däl.