Täze serhetara syýahatçylyk halkasy işlenip düzülip, ol Türkmenistany, Özbegistany (Horezm, Garagalpagystan) we Gazagystany öz içine alýar diýip, özbek metbugaty habar berýär.
Bu ugur Merkezi Aziýanyň dört sebitini birleşdirýär we syýahatçylara dürli medeni-maglumat maksatnamasynyň hödürlenilmegini üpjün edýär. Ony düzmek bilen Özbegistanyň Syýahatçylyk komiteti degişli guramalar we hususy pudak bilen bilelikde meşgullanyp, logistika we beýleki ugurlara aýratyn üns berdiler.
Syýahatçylara dürli ugurlar hödürlenýär: milli tagamlary dadyp görmek bilen gastronomik syýahatçylyk, tebigatyň özboluşly gözelligini görkezýän ekologiýa syýahaty, däp-dessurlara we hünärmentçilige aralaşmaga mümkinçilik berýän etnografik syýahatçylyk, şeýle hem mukaddes ýerler we taryhy-medeni ýadygärlikler bilen tanyşdyrýan syýahatçylyk.
Bu ugruň çäginde ÝUNESKO-nyň dünýä mirasynyň 15-den gowrak desgasy we milli ähmiýetli ýadygärlikleri ýerleşýär, şolaryň arasynda:
Türkmenistan: gadymy Merw, “Derweze” gaz krateti, Köneürgenç;
Özbegistan – Horezm: Içan-gala we Daşan-gala;
Garagalpagystan: I. W. Sawiskiý adyndaky Döwlet muzeýi, Gyzyl-gala, Çilpyk-gala, Sulton Uwaýs Bobo, Toprak-gala, Aýaz-gala;
Gazagystan: Toryş jülgesi, Bozjyra jülgesi, Şakpak-Ata kümmeti, Şerkala dagy.
Täze ýol Merkezi Aziýanyň baý medeni, taryhy we tebigy mirasy bilen tanyşmak üçin özboluşly mümkinçilikler açýar. Ol syýahatçylara we köpçülikleýin toparlara-da niýetlenendir hem-de sebitde medeni we syýahatçylyk alyş-çalşygyny güýçlendirmäge gönükdirilendir.