Türkmenistanyň Döwlet medeniýet merkeziniň Mukamlar köşgünde türkmen halkynyň Milli Lideriniň «Ömrümiň manysynyň dowamaty» atly täze kitabynyň tanyşdyrylyş dabarasy bolup geçdi. Gahryman Arkadagymyzyň halkymyzy ýene bir ajaýyp eseri bilen serpaýlamagy il-ulsumyzyň begenjini, buýsanjyny goşalandyrdy. Türkmen halkynyň Milli Lideriniň «Ömrümiň manysynyň dowamaty» atly kitaby Arkadag şäheriniň açylyş dabarasynyň şatlykly wakalarynyň üstüni ýetirdi. Tanyşdyrylyş dabarasyna gatnaşan ildeşlerimiz öz çykyşlarynda türkmen halkynyň Milli Lideriniň ömür pursatlaryna bagyşlanan bu kitabynyň özlerinde galdyran täsirlerini uly buýsanç bilen bellediler.
Sahawatlylyk, ýagşylyk etmek ýaly asylly häsiýetler ynsan ykbalyny many-mazmun bilen bezeýär. Pederlerimiz kimdir birine ýagşylyk edip begendirip bilmegi, zerur wagty birek-birege hemaýatyny ýetirmegi hikmetli ýol hasaplapdyrlar. Haýyr-sahawatyň ynsanyň berekedini artdyrýandygy, gazanjyňy ýagşy zada sarp edip, özgeleriň ykbalyny nurlandyryp bilmegiň sogaply ýörelgelerdigi pähimli pikirlerde ýaşaýar. türkmen halkynyň Milli Lideriniň bu ajaýyp eserinde ýagşy häsiýetleriň nesilleriň aň-paýhasyna täsir etmelidigi bilen baglanyşykly pikirleri rowaýatlaryň, taryhy şahsyýetleriň bitiren işleriniň üsti bilen baýlaşdyrylyp, beýan edilýär.
Çykyşlarda türkmen halkynyň Milli Lideriniň «Ömrümiň manysynyň dowamaty» atly täze kitabynda terbiýäniň gymmatly mirasdygy, döredijilik hem zehin başarnygynyň sungata hem tebigata söýginiň sazlaşygyndan kemala gelýändigi dogrusyndaky paýhasly pikirler barada hem aýdyldy.