Şu gün Russiýa Federasiýasynyň Tatarystan Respublikasynyň Kazan şäherinde 2024-nji ýylyň esasy syýasy wakalarynyň biri – BRIKS sammiti geçirilýär. 20-den gowrak ýurduň liderleri Kazandaky BRIKS sammitine gatnaşmaga gyzyklanma bildirdi.
Olaryň hatarynda Hytaýyň Başlygy Si Szinpin, Hindistanyň Premýer-ministri Narendra Modi, şeýle hem Türkiýäniň Prezidenti Rejep Taýyp Ärdogan, Eýranyň Prezidenti Masud Pezeşkian bar.
Kazandaky sammit bu guramanyň döwlet baştutanlary derejesindäki 16-njy duşuşygydyr. Bu gurama 2006-njy ýylda döredilip, ol Braziliýa, Russiýa, Hindistan, Hytaý we Günorta Afrikanyň gysgaldylan görnüşidir.
Bütindünýä bankynyň maglumatyna görä, BRIKS-iň dünýäniň jemi içerki önümindäki satyn alyş paýy 35.7 göterime deň boldy. Bu gurama häzirki wagtda Braziliýa, Russiýa, Hindistan, Hytaý we Günorta Afrika bilen bir hatarda Müsür, Efiopiýam Eýran, Saud Arabystany we Birleşen Arap Emirlikleri ýaly ýurtlary öz içine alýar.
Häzirki wagtda 30 döwlet BRIKS guramasyna agza bolmak ýa-da guramanyň çäklerinde hyzmatdaş-döwlet derejesini almak üçin ýüz tutdy. Olar: Azerbaýjan, Alžir, Bangladeş, Bahreýn, Belarus, Boliwiýa, Wenesuela, Wýetnam, Gonduras, Zimbabwe, Indoneziýa, Gazagystan, Kuba, Kuweýt, Marokko, Nigeriýa, Nikaragua, Pakistan, Senegal, Siriýa, Taýland, Türkiýe, Uganda, Çad, Şri- Lanka, Ekwatorial Gwineýa, Eritreýa we Günorta Sudan.