Ýewropa ýurtlaryndan Şwesiýa bilen Italiýada koronawirus ýokanjy sebäpli girizilen çäklendirmeler gowşadylýar.
Şwesiýanyň hökümeti çarşenbe gününden başlap, “COVID” ýokanjyna garşy girizilen ähli çäklendirmeleri ýatyrýar. Premýer-ministr Magdalena Anderssonyň 3-nji fewralda belläp geçişi ýaly, “pandemiýa entek gutaranok, ýöne düýbünden täze tapgyra gadam basýar”.
Bu çözgüt Şwesiýada sanjymyň ýokary derejesi bilen düşündirilýär. Mundan başga-da, ýurtda az sanly adam koronawirus keseline duçar bolup, reanimasiýa bölümlerine düşýär.
9-njy fewraldan ilata koronawirus ýokanjyna garşy lukmançylyk synagyndan geçmek zerur däl. Dümewiň alamatlary ýüze çykanda öýlerinde bolmak maslahat berilýär.
Ýurtda köpçülikleýin sanjym ýokary derejede geçirildi. Umuman çagalarda we ýaşlarda (0-19 ýaş aralygy) bu görkeziji 56% boldy. Şeýle-de bolsa, 12-15 ýaş aralygyndaky ýetginjeklerde 40% -den 74% -e çenli ýokarlandy. 16-19 ýaş aralygynda sanjym edilenleriň paýy 74% deň boldy.
Şwesiýada 12 ýaşdan uly ilatyň 83,8% -i iki doza sanjym aldy. 18 ýaşdan uly ýaşaýjylaryň 53,1% -i buster sanjymyny kabul edip aldy.
ITALIÝADA ÖRTÜK DAKYNMAK HÖKMANY DÄL
Italiýada açyk howada agyz-burun örtügini dakynmak hökmany talap bolmakdan aýryldy. Ýöne adamlaryň üýşen ýerinde dakynmak maslahat berilýär. Ýurduň saglygy goraýyş ministri Roberto Speransynyň bu babatda çykaran çözgüdi 11-nji fewraldan güýje girýär.
Finlýandiýa 14-nji fewralda, Norwegiýada 17-nji fewralda koronawirus pandemiýasy sebäpli girizilen çäklendiriji çäreleri ýatyryp başlar. Daniýa Ýewropada çäklendirmeleri ýatyran ilkinji ýurtdur.