2024-nji ýylyň maý aýynda ýurdumyzda üstünlikli geçirilen Garaşsyz Döwletleriň Arkalaşygynyň Hökümet baştutanlarynyň Geňeşiniň mejlisinde Aşgabat şäheriniň «Arkalaşygyň täze sport mümkinçilikleriniň şäheri» diýlip yglan edilmegi, şeýle hem Birleşen Milletler Guramasynyň Baş Assambleýasynyň 78-nji sessiýasynda Türkmenistanyň başlangyjy bilen hem-de Milletler Bileleşigine agza döwletleriň biragyzdan goldamagynda «Birleşen Milletler Guramasynyň oýunlary» atly Kararnamanyň kabul edilmegi Garaşsyz ýurdumyzda sporty ösdürmek babatda alnyp barylýan işlere berlen ýokary bahanyň netijesidir.
«Pähim-paýhas ummany Magtymguly Pyragy» ýylynyň 2-nji noýabrynda Hormatly Prezidentimiziň gatnaşmagynda saglyk ýoluna köpçülikleýin ýörişiň çäklerinde Saglyk ýoluny ylgap geçmek boýunça ýaryş geçirildi. Çekeleşikli geçen bu ýaryşa Türkmenistanda ýerleşýän daşary ýurtlaryň diplomatik wekilhanalarynyň we halkara guramalarynyň wekilleri, ministrlikleriň we pudaklaýyn dolandyryş edaralarynyň işgärleri, ýokary okuw mekdepleriň talyplary gatnaşdylar. Saglyk ýoluny ylgap geçmek boýunça ýaryşyň emin agzalary tarapyndan onuň ýeňijileri kesgitlenildi we olara ýadygärlik sowgatlar gowşuryldy. Şeýlelik-de:
Türkmenistanda ýerleşýän daşary ýurtlaryň diplomatik wekilhanalarynyň we halkara guramalarynyň wekilleriniň arasynda geçirilen Saglyk ýoluny ylgap geçmek boýunça ýaryşda Russiýa Federasiýasynyň Türkmenistandaky Ilçihanasynyň 2-nji sekretary Ýakowlew Wadim 46.49 sekunt wagt netije görkezip 1-nji orny eýelemegi başardy. Ýewropa Täzeleýiş we Ösüş Bankynyň Türkmenistandaky wekilhanasynyň ýolbaşçysy Liwni Erik 51 sekunt wagt bilen 2-nji orna mynasyp boldy. Beýik Britaniýanyň we demirgazyk Irlandiýanyň Birleşen Patyşalygynyň Türkmenistandaky adatdan daşary we doly ygtyýarly ilçisi Konlon Stiwen Austin 51.10 sekunt wagtda geçip, ýaryşyň 3-nji ornyny eýeledi.
Ministrlikleriň we pudaklaýyn dolandyryş edaralarynyň işgärleriniň arasynda geçirilen Saglyk ýoluny ylgap geçmek boýunça ýaryşda Türkmenistanyň Içeri işler ministrliginiň işgäri Annagylyjow Perhat 34.21 sekunt wagt netije görkezip, 1-nji orna, Türkmenistanyň Goranmak ministrliginiň Merkezi goşun sport klubynyň Borçnama boýunça harby gullukçysy Saparow Serdar 36.09 sekunt wagt netije bilen 2-nji orna, Türkmenistanyň döwlet serhet gullugynyň N-nji harby bölüminiň işgäri Kakaýew Parahat 42.09 sekunt wagt bilen 3-nji orna mynasyp boldular.
Ýokary okuw mekdepleriň talyplarynyň arasynda geçirilen Saglyk ýoluny ylgap geçmek boýunça ýaryşda Türkmen döwlet bedenterbiýe we sport institutynyň talyby Tuwaklyýew Ýunus 35.01 sekunt wagtda geçip 1-nji orna, Türkmenistanyň Halkara nebit-gaz uniwersitetiniň talyby Babanyýazow Pena 35.02 sekunt wagt bilen 2-nji orna, Türkmenistanyň Goranmak ministrliginiň Harby institutynyň talyby Baýramow Döwletgeldi 35.36 sekunt wagt bilen 3-nji orna mynasyp boldy.