Şu gün — 10-njy oktýabrda ýurdumyzda giňden bellenilýän Saglygy goraýyş we derman senagaty işgärleriniň güni mynasybetli Söwda-senagat edarasynyň sergiler merkezinde «Saglygy goraýyş, bilim we sport Berkarar döwletiň täze eýýamynyň Galkynyşy döwründe» atly halkara sergi, şeýle hem onuň çäklerindäki ylmy maslahatyň dabaraly açylyşy boldy. Her ýyl geçirilmegi asylly däbe öwrülen bu çäre lukmançylyk ylmynyň soňky gazananlaryny saglygy goraýyş ulgamyna ornaşdyrmaga ýardam berýän iň iri we abraýly forumlaryň biridir.
Ýöriteleşdirilen serginiň açylyş dabarasyna Hökümet agzalary, Türkmenistanyň Mejlisiniň deputatlary, ýurdumyzdaky diplomatik wekilhanalaryň we halkara guramalaryň ýolbaşçylary, ministrlikleriň, pudaklaýyn dolandyryş edaralarynyň, lukmançylyk ylmy-kliniki merkezleriniň, Ylymlar akademiýasynyň, jemgyýetçilik guramalarynyň, bilim edaralarynyň, köpçülikleýin habar beriş serişdeleriniň ýolbaşçylarydyr wekilleri, saglygy goraýyş ulgamynyň köp sanly işgärleri gatnaşdy.
Saglygy goraýyş ulgamynyň üstünliklerine bagyşlanyp geçirilýän bu foruma gatnaşýan ýurtlaryň sany ýylsaýyn artýar. Halkara sergide ýurdumyzyň saglygy goraýyş ulgamynyň ösüş depgini, Türkmenistanyň lukmançylyk ylmynda we senagatynda, ilatyň saglygyny goramakda ýetilen sepgitler, ägirt uly kuwwaty, daşary ýurtly hyzmatdaşlaryň bu ulgamdaky işjeň gatnaşyklara barha artýan gyzyklanmalary aýdyň görünýär.
Şu gezekki gözden geçirilişe dünýäniň 30-dan gowrak ýurdundan lukmançylygyň dürli ulgamlarynda iş alyp barýan, derman serişdelerini, lukmançylyk enjamlaryny we sarp ediş serişdelerini, tebigy kosmetiki önümleriň giň görnüşlerini, çaga iýmitini öndürýän kompaniýalar gatnaşýar. Şolaryň hatarynda «Seda Medical», «Vichy», «Omega», «Olympus», «Leica Microsystems», «Sandoz», «Rügger», «Zimmer», «Bionorica», «Siemens», «Sanofi», «Astellas» ýaly köp sanly kompaniýalar bar.
Türkmenistanyň Saglygy goraýyş we derman senagaty ministrliginiň pawilýonynda ýurdumyzyň ýokanç keselleriň birnäçesini aradan aýyrmakda bitiren hyzmatlarynyň ykrar edilýändigine şaýatlyk edýän halkara güwänamalaryň nusgalary, paýtagtymyzda we ýurdumyzyň welaýatlarynda gurlan döwrebap, iň täze enjamlar bilen üpjün edilen lukmançylyk merkezleriniň işini tanyşdyrýan wideoşekiller görkezilýär.
«Saglygy goraýyş, bilim we sport Berkarar döwletiň täze eýýamynyň Galkynyşy döwründe» atly halkara sergi işewürligi ösdürmek, bazary öwrenmek, ýurdumyzyň dürli sebitlerinden we daşary ýurtlardan hünärmenler bilen duşuşmak üçin uly mümkinçilikleri döredýär. Sergä ýurdumyzyň hususy kärhanalary — Senagatçylar we telekeçiler birleşmesiniň agzalary hem işjeň gatnaşýar. Olaryň hatarynda «Ak Hümmet», «Tebip», «Dermanlar», «Yşgyn», «Saglyk», «Boýbodron» ýaly hususy kärhanalardyr hojalyk jemgyýetleri bar.
Bilim ulgamyna degişli diwarlyklara hem bu gezekki sergide giň orun berlendir. Türkmenistanyň Bilim ministrligi serginiň çäklerinde gazanan üstünlikleri bilen tanyşdyrýar. Bu ýerdäki diwarlyklar we wideoşekiller myhmanlara ýurdumyzda sanly bilim ulgamynyň ösdürilişi bilen tanyşmaga mümkinçilik berýär. Ýurdumyzyň ýokary okuw mekdepleriniň diwarlyklarynda Gahryman Arkadagymyzyň hem-de hormatly Prezidentimiziň tagallalary esasynda bilim ojaklarynda gazanylýan üstünlikler, ýaş alymlaryň oýlap tapyşlary, täsin taslamalary tanyşdyrylýar. Şeýle hem Russiýa Federasiýasynyň, GFR-iň, ABŞ-nyň, Malaýziýanyň bilim ulgamyna degişli düzümleriniň diwarlyklarynda hyzmatdaşlygyň mümkinçilikleri görkezilýär.
Türkmenistanyň Bedenterbiýe we sport baradaky döwlet komitetiniň bölüminde ýurdumyzda hormatly Prezidentimiziň goldaw-hemaýaty netijesinde täze belentliklere çykýan türkmen sportunyň üstünlikleri, türgenlerimiziň halkara ýaryşlarda gazanan kubokdyr medallary görkezilýär. Türgenleri halkara ýaryşlara taýýarlamak, olaryň fiziki ýagdaýyna baha bermek, türgenleşiklerden soňky dikeldiş işlerini geçirmek üçin ulanylýan innowasion serişdeler hem sergä gatnaşyjylaryň ünsüni çekýär.