Gyrgyz Respublikasynyň Prezidenti Sadyr Žaparow Türkmenistanyň Prezidenti Serdar Berdimuhamedowa Oraza hem-de Nowruz baýramy mynasybetli mähirli gutlaglaryny iberdi.
Gyrgyz Baştutanynyň gutlag hatlarynda şeýle diýilýär:
Öz adymdan hem-de Gyrgyz Respublikasynyň halkynyň adyndan Sizi we Türkmenistanyň doganlyk halkyny Nowruz baýramy bilen tüýs ýürekden gutlaýaryn. Beýik ahlak taglymlaryny alamatlandyrýan bu mübärek bahar baýramy ruhy tämizlige, döredijilige, sazlaşyga ýardam berýär, kalplarymyzy şatlyk, bagtyýarlyk we röwşen geljege umyt bilen doldurýar. Nowruz baýramynyň köpasyrlyk däplerini dowam etdirýän ýurtlarymyzyň arasyndaky özara bähbitli hyzmatdaşlygyň mundan beýläk-de täze many-mazmun bilen baýlaşdyryljakdygyna hem-de çuňlaşdyryljakdygyna ynanýaryn.
Şeýle hem Gyrgyz Respublikasynyň halkynyň adyndan hem-de hut öz adymdan Sizi we Türkmenistanyň halkyny musulman ymmatynyň beýik baýramy bolan Oraza baýramy bilen gutlaýaryn. Oraza dünýäniň ähli musulmanlary üçin mukaddes baýram bolup, ruhy päkligi, hoşniýetliligi, rehimdarlygy, agzybirligi alamatlandyrýar.