Ispaniýanyň “Real Madrid”, Angliýanyň “Mançester Ýunaýted” hem-de Italiýanyň “Ýuwentus” toparynyň ozalky hüjümçisi Kristiano Ronaldo UEFA-nyň ýörite baýragyna mynasyp boldy. Ol UEFA-nyň Çempionlar ligasynda iň köp gol geçiren futbolçy hökmünde bu baýragy almaga hukuk gazandy.
Oňa baýragy düýn UEFA-nyň Çempionlar ligasynyň täze möwsüminiň bije çekişlik dabarasynyň öňüsyrasynda gowşuryldy.
39 ýaşyndaky futbolçy bu baýrak barada şeýle diýdi: “Bu baýraga mynasyp bolmak meniň üçin uly hormatdyr. Meni goldaýanlaryň ählisine minnetdarlyk bildirýärin”.
Ronaldo Çempionlar ligasynda geçiren gollary boýunça Lionel Messiden 11 gol, Robert Lewandowskiden 46 gol öňdedir. Portugal hüjümçi 7 möwsümde Çempionlar ligasynyň iň köp gol geçiren futbolçysy boldy.
Şeýlelikde, Ronaldonyň Ýewropanyň iň abraýly futbol ýaryşy bolan Çempionlar ligasyndaky 18 ýyllyk karýerasynda gazanan üstünligi Monako şäherinde geçirilen 2024/25-nji ýylyň möwsümindäki Çempionlar ligasynyň bije çekilişiginde ýörite baýrak bilen bellendi.
Mälim bolşy ýaly, Ronaldo Çempionlar ligasynda 183 duşuşykda oýnap, 140 gol geçirdi. Ol 2023-nji ýylda Ýewropa karýerasyny jemläp, Saud Arabystanyna geçdi. Häzirki wagtda hem “Al-Nasr” saud toparynda çykyş edýär.