Portugaliýaly hüjümçi Kristiano Ronaldo resmi taýdan Angliýanyň “Mançester Ýunaýted” toparyna geçdi. 12 ýyldan soňra ozalky toparyna dolanyp gelen Ronaldo 2+1 ýyllyk şertnama baglaşdy. Bu barada “Mançester Ýunaýted” toparynyň metbugat gullugy habar berýär.
Ronaldo ýylyň futbolçysyna berilýän “Ballon D’or” baýragyny 5 gezek gazandy. Şeýle hem ol sport durmuşynda 30-dan gowrak uly kuboklaryň eýesidir.
Ronaldo 5 gezek Çempionlar ligasynyň, 4 gezek FIFA klub dünýä çempionatynyň kubogyny gazanyp, Angliýada, Ispaniýada we Italiýada 7 gezek liganyň çempiony bolup, Portugaliýa bilen Ýewropa çempiony boldy. Ol 3 dürli ýurduň futbol boýunça milli çempionatynda ýeňiji bolan ilkinji futbolçy boldy.
Ronaldo “Mançester Ýunaýted” toparyna geçendigi barada beren beýanatynda: “Bu topar hemişe ýüregimde aýratyn orun tutdy. Janköýerleriň öňünde “Old Trafford” stadionynda ýene oýnamaga sabyrsyzlanýaryn” – diýdi.
“Mançester Ýunaýted” topary Italiýanyň “Ýuwentus” toparyna 15 million ýewro tölär. Bu transfer tölegi hem 5 ýylda amala aşyrylar. Şeýle hem futbolçy bilen täze toparynyň gazanýan üstünlikleri esasynda 8 million ýewro goşmaça töleg ediler.
Ronaldo 2018-nji ýylyň iýulynda 117 million ýewro möçberinde Ispaniýanyň “Real Madrid” toparyndan “Ýuwentus” toparyna geçipdi.